|
Grandes konferensyas monetaryas en muestra sivdad Estambol tyene la alegria de dar, en este momento, la hospitalidad a multiples myembros del Fundo Monetaryo Internasyonal i de la Banka mundyal para una serie de kolokyos internasyonales ke (lo auguramos de todo korason) seran provechozos para la lucha ekonomika kontra el emprovesimyento. Desde los primeros dias de la kriza, el kudyo del prezidente del FMİ/İMF Dominique Strauss Khan fue konsakrado al ayudo a los payizes ekonomikamente flakos afin de kombatir la ambrera i la mizerya. Segun lo ke dize el kotidyano elektroniko “le Figaro“ de Martes 6/9, Dominique Strauss Khan disho ke la reaktivasyon ekonomika mundyal es ainda frajil i se developa a un ritmo muy lento. El premyo Nobel de Medikeria atribuado a tres Amerikanos El premyo Nobel de medikeria fue atribuido a tres sitizanos Amerikanos Elizabeth Blacburn, Carol Greider i Jack Tzostak por sus lavoro sovre “la Enzima Telomerase” ke proteja las selulas umanas kontra el envejesimyento i ke puedra ayudar tambyen a la lucha kontra el kanser. Gilad Shalit Fotografias mandadas a Benyamin Netanyahu kontra liberasyon de 19 palestinyanas, provan ke Gilad Shalit esta en vida i en buen estado de salud. Ruidos koryen ke en pokos dias Gilad sera tambyen liberado i puedra retornar a su payis ande lo asperan kon despasensya su famiya, sus amigos i todo Israel. |
