Rezultados briyantes de varyos estudyantes İzel Barokas termino su anyada de estudyo, klasado treser de su promosyon en la “Sabancı Ünevirsitesi”, seksyon Ekonomia. Cem Behmoaram kumplio sus estudyos en la Universidad Kanadyana “Mc Gill” kon el titolo “Alto Honor” Lara Behmoaram fue diplomada, klasada primera, de la “Istanbul Teknik Üniversitesi, Mimarlık Bölümü” |
Muestras sinseras felisitasyones a los loreatos i syempre reushita en sus futuro.
Bodas en la Sinagoga Neve Şalom Enverana alegre keridos lektores. Despues de 3 semanas de silensyo de muestra rubrika , muestro dezeo es de darvos buenas novedades ... logros... fyestas i gozos... Bodas en la Sinagoga Neve Şalom Kaji kada anyo, a semejante epoka, se selebra en la ermoza Keila Neve Şalom adornada de flores ı realsada de kantes por la mas parte liturjikos, la unyon de mansevos i mansevas ke se enkontraron i amaron durante el periodo de sus estudyos, leshos de sus payis de nasimyento. Dos kozas los adjuntan por syempre: sus amor mutual i la apartenensya a la mizma kreensa, la mizma doktrina i el mizmo ideal. Ansi: Şeyla Gabay i Elad Daahan / Karolin Geron i Ceki Sağız / Lucille Levi i Elliot Wagschal / Beril Tari i Daren Becker / Perin Behar i Jefrey Marcus. aunaron sus destinos por syempre para una larga vida de Kerensya, Amor, Armonia i Prosperidad. El Dyo ke los bendiga.