Dos akontesimyentos

El mundo esta realmente en un estado de terrivle  inkoherensya.

No es la primera vez ke oyimos esta afirmasyon, ni la primera vez ke mos topamos delantre  situasyones paradoksales ke sovrepasan muestro entendimyento ...En syertos  lugares: rigorizmo kategoriko, dezeo de ortodoksia absoluta  ke fatalmente ayega a una dezhumanizasyon de la persona... En otras esferas, un  desenkadenamyento pasyonal intempestivo.   

De una parte, el integrismo absoluto, la devosyon enverso  vyejos  konseptos (puede ser djustos en los siglos leshanos ande fueron enunsyados)  ma ke, kon el tyempo ke pasa i la evolusyon inevitavle del mundo, devinyeron  kaji perikolozos por kavza de una lektura ekskluzivamente literal, la kuala mos alesha de los imperativos sosyales de muestra epoka..

De la otra, la pasyon desmezurada de munchos de muestros kontemporeanos (prinsipalmente de los mansevos) por todo lo ke es muevo, un enfokamyento ekskluzivo en kualkyer koryente filozofiko, literaryo o artistiko moderno.   

Ansi, dos eventos ke no tyen entre eyos nada de komun, dominan en este momento la prensa eskrita  i odyovizual.

En Iran, la presyon governomental  sovre el movimyento anti governomental  se esta  de mas a mas apretando ... se avla de punisyones severas i mizmo de sentensyas de muerte enverso los shefes de la rezistensya...

Eske el movimentyo de protestasyon tyene la posibilidad de reushir? es ke el puedra rezistir al espanto de kastigos inhumanos propyos a la epoka medyeval? 

De muevo (komo es el kavzo de todo modo de integrizmo absoluto, de ke relijyon ke sea) un  enserramyento irreduktivle en teorias enteramente  echas de preseptos sovrepasados..., de muevo un  absolutizmo en sus  konviksyones ke no desha lugare al razonamyento ni al dubyo... de muevo el refuzo de todo lo ke le es kontraryo....

Kaji simultaneamente, en  otros kontinentes, a la sigida de la muerte de un artisto ke devino un idolo de la manseves, manifestasyones de una dolor eksesiva  de miles de personas, deifikasyon (inkomprensivle en su dimensyon) de un muzisyano, puedeser rennovador en su estilo i su teknika, ma kon un pasado personal bastante dubyozo.

Dos eventos ke no tyenen nada de komun entre eyos i ke se pasan a miles de kilometros el uno del otro... nada de semblable en sus esensya respektiva, ma en kada uno de entre eyos la mizma desmezura, la mizma absensya de dimensyon humana...  el uno en la reaksyon de su relijyozidad ke refuza la valor de la persona en la diversidad de su ser ...el otro en la manifestasyon eksesiva de su dolyo.

Ande estan los vyejos filozofos de los tyempos pasados ke mos ensenyaron “la djusta mezura”?