Sintimos personas keshandosen de la kurteza del tiempo, de no pueder alkansar a azer todo ets.. La Bruyere disho: “Los ke se keshan de la kurteza de los diyas, son los ke no los emplean bien..” İ en vezes adjustan a sus keshas ke no tienen tiempo afilu de repozarsen u de azer vakansas...” Puede ser keridos amigos, ke la vida no es tan kurta, es mozotros ke la azemos asi. Penso ke es una simple kestyon de organizasyon, una manera de dishiplina. En un diya normal, se puede topar tiempo para kada koza, a mi opinion. Basta de ser organizados, dar la prioridad a lo mas importante.
Munchos lektores van a dizir ke es muy fasil de dar konsejos. Komo se puede alkansar a todo? Komo se puede organizarse, lavorando afuera de kaza, mas i mas si ay famiya? Muncha razon, no es fasil. Bueno, lavorar... siguro se deve lavorar. En vezes es mas ke un menester, es un ovligo. Espesyalmente en muestros diyas. Komo dishimos, lavorar, si... Ma i repozarse? İ distrearse?... No me akodro ken disho esta palavra: “Seriya una kondisyon ideal de vida, si se pudiya apartar al divertir el mizmo tiempo ke se pasa a lavorar!...” Frankamente, i esto lo esto topando un poko egzajerado! Ma esto d’akordo ke se lavora mijor kuando el meoyo i el puerpo estan repozados.
Syempre pensi ke en una vida bien ekilibrada las distraksyones son kaji indispensavles. Ma no kale mesklar distraksyon kon vakansas. D’akordo, de vez en kuando se toma unos kuantos diyas de vakansas. Ma no kale azer este yerro de pensar ke distraksyon es unikamente sinonimo de vakansas. La persona se puede divertir mizmo sin estar en konje. Una seans de sinema u teatro, una komida afuera en famiya u kon amigos, un konserto ets... son remedyos, espesyalmente en invyerno. En la Primavera, azer piknik, un torno kon vapor, asentar en un kafe al bodre de mar (siguro los ke tienen la shans de bivir serka la mar) estos son las distraksyones ke me vienen al tino. İ son divertimientos ke se pueden alkansar fasilmente.
Naturalmente ay personas ke preferan konsiderar la nosyon distraksyon en una manera mas ancha u mas diferente. Kero dizir, no unikamente en forma de pasatiempo u de pasear. La verdad ke no se komo eksplikarlo. En fransez ay un byervo ke aklara muy bien mi idea. Es el byervo “loisir”. No konosko un sinonimo en judeo-espanyol. Lo ke kero dar a entender yo es, ke munchas personas preferan meldar, sintir muzika, okuparse de un “hobby”, o azer un sport ets... Son aktividades ka dan plazer, repozan i a lo menos, aleshan por un syerto tiempo la persona de sus problemas i liberan el meoyo de sus preokupasyones.
Asta agora al pareser avlimos de una jeneralidad i mas demaziya de las distraksyones de los adultos. Avlaremos i un poko de los chikos. Eyos, mas muncho ke los grandes, tienen menester de trokamiento. En mizmo tiempo es un modo de instruksyon. Es importante de krear ermozos rekuerdos, syendo ke los suvenires de chikez mos akompanyan toda la vida. Un grande personaje, ke tambien no me esto akodrando ken, tiene dicho : “El avenir de una kriatura es syempre la ovra de su madre..” Es djusto. Solamente yo prefereria dizir ke es, no solo la ovra de la madre, tambien i del padre, de los dos djenitores. En estos diyas ke se esta aserkando el “Diya del Padre”, no kero azerles esta indjustisya. Es verdad, los rekuerdos de muestra chikez, son muestro trezoro presyozo.
De ande a ande vine!... Empesi kon distraksyon i me pyedri en medyo de las kriaturas... Lo mijor es de kortar aki, suetando a todos divertimientos asigun sus dezeos.
