Doz ermozas bodas en la Sinagoda Neve Şalom
Alhad el 17 del mez de Mayo 2009.
Süzet Kampeas i Melih Alvo
Emi Varon i Alper Eskenazi
adjuntaron sus destinos por una larga vida de amor, felisidad, gozo i prosperidad. El Dyo ke bendiga estas unyones.
Muestras sinseras felisitasyones a los novyos ansi ke a las famiyas “Kampeas - Alvo” i “Varon - Eskenazi”.
A la sigida de la primera entrevista Obama – Netanyahu...
Komo previsto, el primer kontakto entre Barack Obama i Benyamin Netanyahu no ayego a un rezultado definitivo. El milagro no se produzyo, no puedia produzirse tanto presto...
Aunke animados por un mezmo dezeo de paz en la rejyon del Oriente-Medyo, una diverjensya de “punto de vista” persiste syempre entre el Prezidente Amerikano i el primer Ministro Israelyano.
El Amerikano insiste sovre “Dos Estados el uno Israelyano el otro palestinyano, absolutamente independentes al interyor de sus frontyeras seguras i definitivas”.
El Israelyano propoza “Una absoluta libertad de governansa i un grande desvelopamyento ekonomiko para los Palestinyanos” kontra “El rekonosimyento de un Estado Israelyano Djudyo”.
Komo todos ya la saven, el Partido Palestinyano refuza kategorikamente esta ultima kondisyon, lakuala es egzistensyalmente indispensavle para la supervivensya del Estado de Israel.
Konsernando la kuestyon del potensyal nuklear Iranyano, los dos Governadores manifestaron la mizma inkyetud i ekspresaron la mizma nesesidad de kudyo i absoluta vijilansya.
Prezentasyon de una antolojia de Poezias de Yunus Emre traduzidas en Ebreo
En data del 14 Mayo 2009, el Sentro kultural “Bet Bialik” de Telaviv organizo una ermoza prezentasyon de la traduksyon en lingua Ebrea de una seleksyon de poezias mistikas del grande poeta Turko “Yunus Emre”, debasho el titulo:
“Antologia shel shirim Sufim me et Yunus Emre”
La asistensya era muy selekta, kompuesta de diplomatos Turkos enkavesados byen entendido por el Embashador de Turkia en Israel “Namık Tan” ke fue resivido kon palmas, ansi ke de nombrozas personalidades Israelyanas, profesores de varias universidades, intelektuales i amigos de muestro Payis.
A la sigida de un grande retardo del Embashador Turko por kavza del trafiko, el diskorso de avyertura fue pronunsyado por Momo Uzsinay prezidente de la asosyasyon “Türkiyeliler Birliği”.
Poko despues su arrivo, el grande Diplomato Turko tomo tambyen la palavra i resivyo aplozos kayentes yenos de ardor i entuzyasmo. Poemas de Yunus Emre fueron resitados kon fervor en lingua Turka ansi ke sus traduksyon en Ebreo i nombrozos universitaryos tomaron la palavra para avlar del grande filozofo i poeta Turko.
Seremonia inolvidavle ande fue ekspresada la amistad i la sensibilidad ke ata los dos payizes el uno al otro.
