El Papa en Israel
Benit XVl shefe supreme de la Eglisya Katolika Romana fue resivido en Israel por el Prezidente Shimon Perez ke pronunsyo una formula de “byen venida” en lingua latina i del Primer Ministro Binyamin Netanyahu ke devia partir el mizmo dia, poko despues, por el Ayifto. Su primera vijita fue al Memoryal de Yad Vashem ande el se enkorvo para onorar el rekuerdo de las viktimas del Holokosto i disho “No mos olvidaremos nunka de la Shoah”.
El Korpus Rabbiniko Israelyano ke le reprosha:”el proyeto de kanonizasyon del Papa Pie XII, el kual avia kedado kayado durante la segunda gerra mundyal delantre el jenosidyo de la populasyon djudia” i tambyen aktualmente, “la reabilitasyon del prelato negasyonisto ke persistyo a nyegar el martiryo de 6 milyones de muestros ermanos” kedo mayoritaryamente retisente.
Una mueva ovra del historyano Rifat Bali
Aktivo, djenerozo en sus bushkidas historikas en el kampo de la situasyon pasada i resyente de los djudyos en Turkia, Rifat Bali ke devyene de dia en dia mas konosido i syempre muy apresyado por su tan interesante lavoro, vyene de publikar un muevo livro intitulado: “Devletin örnek Yurtaşları 1950 - 2003.
Felisitamos kalorozamente muestro amigo Rifat Bali i le auguramos de aklararmos kontinualmente kon muevas ovras bazadas syempre, segun su prinsipyo, sovre faktos i dokumentos absolutamente otentikos.
