El Papa Benedikto XVI arivo a Israel diya de lunes

Dora NİYEGO Judeo-Espanyol
13 Mayıs 2009 Çarşamba

El Papa Benedikto XVI arivo a Israel, diya de Lunes, por un viyaje de sinko diyas, por ‘yamar a la pas, i a dar fin al antisemitizmo’, i por la libertad de orasion, i el entendimiento entre las relijiones.

El objekto de este viaje es de meter fin al malentendimiente entre los djudios i Vatikan.

Duspues ke arivo al aeroporto de Tel Aviv, en su deskorso a los gazeteros, el Benedikto insistio ke los Israelianos i los Palestinianos, kale ke bushken todo modo de kamino para rezolvar sus diferensias en las obzervasiones. Benedikto prevenio los Israelianos i los Palestinianos, a topar una solusion ke va permeter a las dos partes de bivir endjustos en pas.

El Papa izo una yamada a dar fin al antisemitizmo ke pujo en el mundo entero, i avlo sovre el Holokosto, disho ke va vijitar Yad Vashem por onorar la memoria de los sesh miliones de djudios viktimos en el jenosido de los Nazis.

Lunes la tadre, el Prezidente Shimon Peres i el Papa Benedikto XVI, dieron mesajes de pas en sus deskorsos, por la libertad de orasion, i por el entendimiento entre las relijiones, en Beit Hanassi, ke es la residensia del Prezidente.

Peres disho ke el puevlo de Israel lo estan viendo al Papa, komo un pionero de pas. El Prezidente aksentuo (vurgulamak), ke el judaizmo es konstruido sovre la tolerensia de las otras relijiones. En su deskorso, Peres avlo tambien de las sufriensas en el pasado, del puevlo djudyo, i ke el Estado de Israel fue un refujio (siginak) por eyos.

Peres aksentuo tambien ke, komo los djudyos son desendientes de las viktimas, el korason del puevlo djudyo es sansible a las sufriensas de todo modo de puevlo. Peres kontinuo, dizyendo ke los lideres espirituales pueden formar el komino para los dirijentes politikos, i alimpiar los obstakles (engel) enriva de este kamino, ke los esta detenyendo de azer la pas.

El Papa Benedikto disho ke, el kere asigurar los Israelianos, ke su viaje a los lugares santos, es por una orasion, por priyar por el presiozo regalo de unidad i de pas por el Medio Oriente, tambien por toda la umanidad. Yerushalaim es una sivdad ke prezanta a los djudios, los kristianos, i los muslumanes, el dover i la posibilidad de azer sus orasiones, i de rogar al Todopuederozo, por la unidad de la famiya umana, kriyada por Abraham, i de repetar la verdad ke el ombre es un bushkador del Dio. Kada persona, famiya, komunidad, o nasion tiene el dirito de bivir en djustisia, i tiene la obligasion de lavorar por la pas. El Papa ajuto tambien estos biervos: ‘Kual padre kere la violansia, i la insekuridad por sus ijos?  Dinguna politka umana no puede ser dirijada kon konfliktos i kon violansia. Esto oyendo los gritos del puevlo ke esta biviendo enriva de esta tierra, por djustisia, por pas, por sekuridad i por una vida sin espanto’.

Durante la seremonia, las ijikas israelianas, vistidas de fostanes blankos, kantaron por el Papa Benedikto. Peres i el Benedikto plantaron endjuntos, un arvole de azitunas. El Prezidente le prezento al Papa dos regalos; dos tayos (sap) de trigo developado por los sientistos israelianos, i un teksto en ebreo, tomado de la Bibla, i eskrito  enriva de silikon, utilizando nanoteknolojiya.

Antes de los deskorsos, el Papa vijito kon Peres, el padre i la madre de Gilad Shalid, el soldado ke esta dayinda.