EL KANTON DEL ARTE

Coya DELEVİ Judeo-Espanyol
29 Nisan 2009 Çarşamba

La Pianista Renan Koen Albukrek

Kuando konosi Renan Koen en el anyo 2004, dayinda no saviya ke era ija de Eti Koen, la maestra de “Patchwork”. Fue myentres un konserto en el salon Cemal Reşit Rey, ke sinti por primera vez Renan Koen. Akeya epoka  no aviya dayinda tomado la alkunya Albukrek. En el sovredicho konserto, Renan estava akompanyando la soprano Şebnem Ünal, kon ken desde el anyo 1993, kontinuan las investigasyones sovre la “İnfluensa Resiproka en la Muzika Universel”. En el kuadro de estos lavoros, en 2003, formaron djuntos kon otras amigas, el grupo “Melodias Epikas”, ke es el grupo kesinti en el konserto de 2004.

Reelmente fue un konserto enteresante, kon egzempyos komparativos de la Muzika Barok Evropea, la Muzika Otomana i la Muzika Sefaradi. Sintimos egzempyos de estas muzikas de los siglos 17-18- i 19... Aryas de syertas Operas de la Epoka Barok.. Operas ke fueron kompozadas para el Palasyo Otomano... Ovras de Muzika Klasika Turka de famozos kompozitores Otomanos de la epoka, komo Hacı Emin Bey, Itri, Bohor Mevorah ets... El konserto se termino kon kantes Sefarad komo Avrime Galanika, Madre miya si me muero, Adiyo Kerida i otros ko no me akodro agora.

Vinyendo al anyo 2005... En el kuadro de las selebrasyones del “Diya Evropeo de la Kultura Djudia”, en la Sinagoga Ashkenaz, tuve la sigunda okazyon de sintir el grupo “Melodias Epikas”. Esta vez era komo un buketo teatral kompozado de kantes de bodas djudias... Entonses ya konosiya yo bastante sovre la identitad i karyera muzikal de Renan...

En el anyo 1979, myentres el “Festival de Estambol”, fue envitado un  grupo de koristos Evropeos. El shef de este grupo deskuvryo el talento de la chika Renan Koen. İ fue ansi, ke aedada solamente de 8 anyos, Renan ampeso kon “Flut” a su karyera muzikal. En 1983 ampeso al piano kon la famoza pianista turka, Ayşegül Sarıca. En mizmo tyempo fue diplomada de la klasa de flut, seksyon medyana (orta bölüm) de la Universita Mimar Sinan.

En Paris, Renan kontinuo al piano kon Germaine Mounier i otros. En Londra lavoro kon la pedagoga Maria Curcio. Kompleto en Atina el programa “Art et Qualité de Vie” (Arte i Kualidad de Vida), un programa de pedagojiya ensenyando la terapiya kon muzika. Komo rezultado de estos lavoros, Renan es el uniko miembro feminin (tek bayan üye) turko de la Federasyon, “Société Hellenique du Muzikothérapie et Expression Créative”.

Renan es posesora de diversos premios. Partisipo a diferentes konkorsos, entre otros, “Chopin Etude” 4en premio, konkorso “Cemal Reşit Rey” 2. premio... Aktualmente, solista en diversas orkestras, Renan esta tambien kontinuando a dar resitales. Ultimamente partisipo a las festividades del “Diya Evropeo de la Kultura Djudia 2008”. En la Sinagoga Ashkenaz, dyo un resital “Los Pontes”. Aparte de su resital, akompanyo la soprano Linet Şaul en el programa “ Los Kantes de mi Avuela”. Sintimos i la performansa de syertas kompozisyones de Renan Koen...

Suetamos a Renan Koen muevas reushitas en su karyera artistika.