La Famiya del Gran Rabino Rav Izak Haleva rika de un muevo myembro
Luzya i mazaloza, una ija nombrada; Malka Reyna nasyo en la kaza de Leyla i Rav Naftali Haleva. İnyeta del Gran-Rabbino Rav İzak i Rejina Reyna Haleva, ansi ke de Ester i Marsel İpekçioğlu. Eya sera portadera de paz i alegria para su entorno, su payis i su puevlo. El Dyo ke la bendiga i le akorde vida larga, ansi ke prosperidad i kumplimyento de todos sus buenos dezeos. Todas muestras felisitasyones i la ekspresyon de muestro respekto i de muestra amistad a las famiyas Haleva i İpekçioğlu.
“Estado Djudyo” Mahmoud Abbas refuzo el termo de
En repuesta a la demanda de Binyamin Netanyahu de nombrar tambyen “Estado Djudyo” lo ke abitualmente yamamos “Estado Israelyano”, el Prezidente Palestinyano refuzo kategorikamente esta segunda denominasyon. Devemos presizar kel dezeo de esta segunda denominasyon de la parte de Netanyahu no konstituo nunka ni konstitue en nigun kavzo, un kondisyon irrevokavle al retorno a muevas negosyasyones entre los dos governos.
Mensaje vyejo de 65 anyos de 7 prizonaryos de los kampos de la muerte
Ovreros en funksyon en la restorasyon de una fragua (ke avia apartenido al kampo de la muerte de Auschwitz-Birkenau) toparan una bocha ke kontenia un mensaje vyejo de 65 anyos de 7 prizonaryos.nombrados: “Albert Veissid” de Lyon, “Bronislaw Jankowiak” de Poznan, “Stanislaw Dubla” de Laskowıce, “Jan Jasik” de Radom, “Waclaw Sobczak” de Konin, “Karol Czekalski” de Lodz, “Waldemar Bialobrzeski” de Ostroleka. Al pareser, dos de estos 7 sinyataryos pudyeron salvar. Ke estos nombres sean gravados en muestra memorya.
