La orasyon Birkat Ahama en dos
sinagogas
Es kon fervor i grande emosyon ke la Orasyon Birkat Ahama fue dicha Myerkoles pasado, erev de Pesah, en dos diferentes sinagogas de Estambol: en el templo Ashkenaz ke fyesta este anyo su 110’en aniversaryo i tambyen en el Kaal Etz Ahayim de Ortaköy. La asistensya era grande en las dos Kehilot, ande se orasyono i kanto kon alegria i kon la konviksyon ke este evento tan raro sera el prezaje de una mueva epoka de Paz i de Esperansa.
Djesto de grande kortezia de la parte de Mahmoud Abbas
El Prezidente Palestinyano Mahmoud Abbas telefono alhad demanyana a Binyamin Netanyahu para augurarle Pessah Alegre. Es la primera vez desde la instalasyon del aktual governo Israelyano, ke los dos shefes tuvyeron la okazyon de komunikar por telefon. De su parte, Binyamin Netanyahu izo aluzyon a la epoka ande los dos avian kooperado en el pasado i disho ke el esta djustamente planifyando de retornar a esta kolavorasyon afin de parvenir a estableser una situasyon de paz entre los dos puevlos.
Muevos aktos de antisemitizmo en Fransya
Al aserkamyento de la data de komemorasyon de la Shoa, el Memoryal de la Deportrasyon de Drancy fue profanado de una manera fea i salvaje. Malgrado la vijilansya de las otoridades de este payis, la Fransya es malorozamente uno de los payizes evropeos ande se manifesta lo mas el odyo enverso el Judaizmo i ande los konfliktos ayegan a un nivel de antagonizmo reprehensivle. La ministra Franseza de los Echos Interyores “Michele Alliot-Marie” kondano fuertemente este djesto de antisemitizmo.
ORASYON AL SOL, BIRKAT HAHAMA
El 8 de Nisan Miyerkoles los Judyos del mundo entero diran la orasyon del sol la demanyana denprano. La dalkavo vez de este evenimyento relijyozo era en Nisan 1981. La futura orasyon sera dospuez de 28 anyos. Kuando se dize Birkat Hahama el sol se topa en al mizma pozisyon ke estava la demanyana de la kreasyon del sol, un Miyerkoles. Si el sielo esta enuvlado no se puede dizir la orasyon. Kale ver en direkto el sol. Los sientifikos moz dizen de no mirar direktamente al sol. Mirar mizmo unos kuantos sigundos puede kavzar en la retina del ojo, danyos ke no se pueden kurar. El Sol no va kemar la retina ma va kavzar trokamyentos chimik ke danya el sentro de la vista. El Sol, el Mundo i las Planetas seran en la mizma pozisyon ke estavan en la kreasyon del mundo i la salida de Ejipto (Mısır).
