No, no se trata de erotizmo, ma del amor por un judaizmo avyerto, komunikativo i no enserrado i limitado a si mizmo.
Al pareser, Jacques Attali, todo en revindikando syempre su apartenensya a la “etika Hebraika en su umanizmo i sovre todo su universalizmo” i en praktikando las altas valores de muestros profetas transmetidas a traves los siglos por muestros savyos, kere (en la mezura ande esto es posivle) adaptar el Judaizmo al konteksto de la epoka prezente.
El mos dize: “-Me ambezi a ser kuryozo, amorozo del Judaizmo, de su historya,de su manera de pensar, de lo ke el dize del mundo, de lo ke permete tambyen de pensar, de entender i de imajinar... Me plaze la manera kon la kuala el resive todas la kritikas, i tambyen su manera de syempre dubyar de si mizmo..
El me aze refleksyonar”
No tengo ainda el livro entre las manos, espero resivirlo en poko. Jacques Attali es un autor por el kual tengo personalmente muncha admirasyon; muy idealisto ansi ke muy imajinativo todo en kedando muy rasyonal , su dezeo de un Judaizmo avyerto no es bazado sovre una utopia ma sovre la realidad i sovre la lucha ke devemos dar afin de mantener su perenidad.
En sus multiples livros este grande pensador mos avlo del adelantamyento de la sivilizasyon umana, ande proporsyonalmente el puevlo djudyo partisipo i syempre partisipa en muy grande kuantidad kon sus preseptos inalyenables, su esprito inventivo, su enerjia , su amor de la vida (valor suprema entre todas) i la perseveransya de su fidelidad a una identidad difisil a yevar ma a la kuala el se obstina a syempre kedar atado.
En repuesta a la kestyon formulada por Albert Bensoussan, editoryalisto de la revista “Informasyon Juive: “ –Deke konsideras ke la Diaspora se esta disolvyendo?: Jacques Attali respondyo: “ Eya riska de disolverse en no syendo syempre amoroza del Judaizmo i en no transmetyendo su Historya, su Teolojia i sovre todo sus Valores ke akordan la preponderansya a la vida i al altruismo.
I a la pregunta del mizmo editoryalisto: “En el buto de evitar las katastrofas ke amenazan el Judaismo, tu propozas un programa bazado sovre tres ideas: “Valorizar los grande savyos de la ley”, “ Salvaguadrar el esprito familyal” i “ resivir los muevos venidos”. ke kijites realamente ekspresar?
Attali dyo esta repuesta: “Las dos primeras ideas son simples, la tresera konsiste a ser avyeretos i akojedores enverso los ke keren partajar la misyon Djudia, kuala ke sea la motivasyon...salir del enserramyento obskurantisto ke es kontraryo a la ensenyansa del Talmud. Kale azer partajar el amor de las valores djudias , i por esta razon kale bivir el Djudaizmo de una manera alegre, apasyonada , avyerta ansi ke tolerante i no sektarya”.
Este ermozo artikolo de Albert Bensoussan publikado en la revista “İnformation Juive” me entuzyasmo i no pude detenerme de dar una traduksyon malorozamente parsyal i aproksimativa de unos kuantos pasajes, a los lektores del Salom.
Luchar por un Judaizmo avyerto, kreador de valores umanas, en mizmo tyempo fidel a si mizmo i respektuozo enverso los preseptos de los otros tanto ke eyos mizmos respektan el dever de umanizmo i de universalizmo.
