Segun lo ke meldimos en la prensa internasyonal i lo ke se puede persivir en los varios diskorsos de munchos partisipantes, la vijita de Obama en varios payizes Evropeos tomo fin de una manera ke puede ser konsiderada komo muy pozitiva i se terminara kon su vijita en Turkia..
Doz de sus prinsipales objetivos fueron i son syempre: “Reforsar ansi ke intensifikar las relasyones kon la Evropa” i “Restableser el kontakto i la amistad kon el mundo Muzulmano”.
İnkontestavlemente, los problemas tratados no fueron todos rezolvidos, ma grandes pasos fueron echos en el kampo de la politika internasyonal: uvo por seguro kontestasyones bazadas sovre argumentos ande diferentes sensivilidades fueron ekspresadas, esto es inevitavle i kada una tyene su parte de verdad komo tambyen de suseptibilidad.... Tanto ke se trata de una asemblea de ombres de buena voluntad, avyertos al dialoguo, kualkyer kestyon puede ayegar sino a una solusyon definitiva, ma a lo menos a un estado de komprensyon resiproka.
En todo kavzo, la prezensya de Barack Obama partisipo a krear una atmosfera de negosyasyones mas o menos konsilyentes.Durante las varias sesyones, el eskopo de kualkyer diskusyon no fue la impozisyon de una syerta manera de ver las kozas, ma sovre todo de oir i de kerer entender lo ke el otro dize.
No se si es la reunyon en el de dos orjenes diferentes o byen los estudyos ke el izo en una de las mas grandes universidades del mundo, puedeser mizmo su kondisyon de preto en un ambiente blanko empapushado de rasizmo latente (ke lo ovligo desde su chikes a syempre pensar profundamente antes de azer el meno paso i a pezar lo pozitivo i lo negativo de kada palavra antes de pronunsyarla) ay en Barack Obama una kualidad de ombre de Estado ke munchos otros dirijentes no tyenen.
Barack Obama en Turkia, Barak Obama en Estambol. Su vijita fue para el prezidente Amerikano la okazyon de reafirmar su amistad enverso el puevlo Turko i la importansa vital de muestro payis en una “estratejia de paz” bazada sovre el dialogo i no la polemika, el tambyen ekspreso su dezeo de ver
la Turkia
azer parte de
la Unyon Evropea.
El fue resivido por las mas grandes personalidades de
la Turkia
en una atmosfera de voluntad de komprensyon resiproka. Munchos problemas fueron abordados kon el objetivo byen definido de ayegar a solusyones pozitivas ke puedran asegurar la armonizasyon de las relasyones mundyales inter etnikas.
El prezidente de los Estados Unidos enkontro igualmente los varyos leaders relijyozos de Turkia, entre los kualos el Gran Rabino Rav İsak Haleva.
