Keridos Korelijionarios.
Dospues de una inviernada bastante triste ke no puedemos dizir ke nos fue muy agradable, alkansimos a la esperansa de los dias luminozos de la primavera kon el arivo de “Pesah”. Agradesemos a el Todo Potente ke nos ayego a estos dias djuntos kon todos nuestros keridos.
“Baruh Şeeheyanu Vekiyemanu Veigiyanu Lazeman Aze”
“Pesah” ke es la fiesta de renovelar i enforteser nuestra fey, nuestra esperansa, nuestra unidad i ermendad kon nuestra konfiensa a nuestro Dyo, no ay dubyo ke tambien enfortese nuestro esprito i nos da la oportunidad de transmeter nuestra kultura a nuestros ninios.
La pregunta de nuestros ijos:
“Ma Niştana Alayla Aze Mikol Alelot?”
“Porke es demudada la noche la esta…?”
no ay duvda ke es una pregunta ke forma el sentro de la “Agada de Pesah”.
En repuesta:
“Meavdut Leherut, Umişibud Ligeula, Umiyagon Lesimha, Umievel Leyom Tov, Umeafela Leor Gadol...”
“Del esklavadje a la libertad, del kativerio a la salvasion de la tristeza a la alegria, del luto a l fiesta, de lo eskuro a la klaridad...”
no konserna solo a nuestros avuelos ke se salvaron de Ayifto en ekeya epoka, sino ke konserna a todos nuestros korelijionarios de todas las epokas i sovre todo a nozotros. Ademas todo esto deve de konsiderarse komo el buto moral i material de toda nuestra vida.
El “Pranso de Seder” ke nos aunamos en su entorno yenos de alegriya i guste komo lo suheto yo, esta siempre dispuesto a la partisipasion de todos los ke keren fiestar el “Pesah” por motivo de partadjar la alegria de la fiesta en un kuadro el mas ancho posible.
Keridos Ermanos.
Kero repetar una otra ves esto ke uzo de dizir kaji en todas las okaziones; nuestro objeto el mas emportante es, de aserkarlos i abrasarlos kon afeksion i kerensya a nuestros ermanos ke se alesharon de nozotros por una razon o otra i no dar lugar a ningun abandono. Todo lo ke se aze en este kampo tendra valor.
Kale tener akel komporto afeksiozo i pasensiozo de Moşe Rabenu entonses ke estava rekovrando el kodreriko ke se aparto del rebanio. El guadrar la unidad de la komunidad es uno de los preseptos emportantes de nuestra santa ley.
Pienso ke el “Seder de Pesah” nos prezenta una oportunidad muy presioza en este kampo ke vos konsejo de profitar.
Todo en estando bien siguro ke vamos a fiestar en kondisiones mas agreables munchas fiestas de “Pesah” en el avenir, vos felisito kon senseridad por la fiesta de “Pesah” i vos bendigo kon todas las bendisiones de la Santa Tora.
Hag Pesah Sameah.
Rav İsak HALEVA
Gran Rabino
