NOVELAS / NOVEDADES
Vyernes el 27 del mez koryente, el presedente prezidente de la Republika Franseza Jacques Chirac, asistyo en la UNESCO, a la sesyon de la “Fundasyon de la Memorya de la Shoah” durante lakuala fue inisyado el proyeto “Aladin” ke tyene komo objetivo la lucha kontra el negasyonizmo i kontra el renyegamyente de la terrivle trajedia djudia.
Jacques Chirac deklaro ke la Shoha devra ser ensenyada en los payizes arabos afin ke este terrivle akontesimyento sea konosido por todos, en toda su realidad: “el drama de la Shoah interdize todo modo de olvido”.
El insistyo sovre el fakto ke no se trata en ningun kavzo de echar una kualkyer responsabilidad sovre los payizes Muzulmanos del Oriente Medyo, ma de arrankar del olvido este drama.
Jacques Chirac fue el primer prezidente Fransez ke aksepto publikamente la responsabilidad Franseza en la deportasyon de numerozos djudyos ke se topavan en este payis durante la segunda Gerra Mundyal.
Shimon Peres deklaro ke Netanyahu proseguira las negosyasyones de paz kon los Palestinyanos
Alhad el 29 del mez koryente, a la okazyon de su prezensya en Evropa, Shimon Peres trankilizo la “Unyon Evropea” i la “Komunidad Internasyonal” en deklarando kel governo de Netanyahu respektara todas las desizyones tomadas por sus predesesores i proseguira las negosyasyones de Paz kon los Palestinyanos.
El disho: “El muevo Governo es atado a las desizyones tomadas por el presedente: va aver una kontinuidad i las negosyasyones por la paz seran proseguidas.”
