En unos kuantos dias “Pessah”, fyesta del renasimyento de la natura i sovre todo, selebrasyon de “la viktorya de la voluntad de libertad sovre el esklavaje i la servidumbre”.
Esta “voluntad de libertad” aparejo el egzodyo en el dezyerto ande un ombre “Moshe” ofresyo al puevlo ebreo el primer kodigo ke izo de el un puevlo de ombres forros, de kriansas pensantes i responsavles, kargadas de una misyon ke trespasa sus destino de mortales…
10 ordenes simples, sin fiorituras, trasaron delantre de este punyado de ebreos, el kamino a segir.
Ordenes immuables, eternalmente validos, ke resumen a eyos solos muestra kondisyon de umanos i muestros deveres los mas imperyozos.
Kedaremos syempre fideles a la misyon ke mos fue preskrita, mos esforsaremos de transmeter el mensaje no solo kon muestras palavras ma kon muestros aktos.
Ningun ser umano tyene el derecho de demisyonar de esta karga, kada uno tyene una koza a kumplir, chika o grande, no importa, todo tyene su valor.
Lo azeremos mizmo sin esperansa i sovre todo sin agresividad. Es kuando la oskuridad es la mas profunda ke es nesesaryo de guadrar intakto su koraje i su voluntad.
