EL KANTON DEL ARTE / Esti Saul - amiga i kolaboradora

Tengo la impresyon ke este teksto va asemejar mas muncho a rekuerdos, ke a un artikolo de arte... Yo konosi el nombre de Esti Saul antes muncho tyempo, ma sin konoserla personalmente

Coya DELEVİ Judeo-Espanyol
11 Mart 2009 Çarşamba

Fue en el Avril 2005 ke mos enkontrimos por primera vez. Asisti akel diya al kokteyl de inogurasyon de la “Ekspozisyon Moderna”, un evenimiento artistiko organizado en el Muzeo Militaryo” de muestra sivdad, en Harbiye.

Malgrado ke estava ayi kon misyon de azer un artikolo para el “Şalom”, devo aklarar ke yo no so una kritika de “Arte”. Yo deviya semplemente dar una vizyon global del evenimiento. Todo en mirando las ovras ekspozadas (no era ekskluzivamente pintura), kontinui a observar los vijitadores. Remarki ke kada uno estava azyendo su komentaryo asigun su impresyon. Tomi notisyas...

A un momento, me topi enfrente de las pinturas de Esti, ande me areti bastante, i kon una impulsyon, ize mi komentaryo... Siguro de mi para mi... “ Un lavoro minusyozo komo una broderiya...una fina dantela. İ no solamente unas kuantas dadas de furcha... Este lavoro de Esti Saul, en su unidad, es komo una senfoniya umana de kolores, sovre un mundo blanko i preto...” Mi sigunda impulsyon fue mi dezeo de konoser Esti. Apersivyendo muestra amiga Güler Orgun, le demandi de prezentarme Esti, savyendo ke son buenas amigas. İzimos una kurta konversasyon i mos separimos.

Apenas mi artikolo aparesyo en el jurnal, Esti me bushko par telefon. Kijo ekspresarme su kontentes i rengrasyamiento por las linyas miyas a sovre su pintura. Reelmente este djesto de Esti i su amabilidad me izo muncho plazer. Si no me yerro, en el 2005 Esti kompleto el 50. anyo de su karyera. Aki no penso dar munchos detalyos sovre los estudyos, su empesijo en la karyera, su lavoro ets... Porke esto ya lo izo muestra amiga Karen Şarhon unas kuantas semanas despues de la sovredicha ekspozisyon. (El Amaneser No.3)

İ dos, tres anyos pasando, en el No.34 de muestra revista, estamos vyendo ke Esti empresto! su pajina a Roz Kohen Drohobyczer, ke es eya tambien una presyoza kolaboredera muestra. Se tratava de la ekspozisyon de “ Esti Saul en Art/İstanbul”. En este artikolo de Arte de Roz, una fraza de Esti me kedo en la memoria: “...Kada uno de mis lavoros tiene su propia estorya. Es al espektador de imajinar esta estorya...” Esto era egzaktamente lo ke aviya echo yo.

Kon Esti semos buenas amigas en desparte de ser kolaboradoras. Par konsekuensa, tenemos munchas okazyones de enkontrarmos en diversos evenimientos sosyal o “profesyonal”, si puedo eksprimirme ansi. Komo fue el kavzo en el 9 Novembre 2006. Estuvimos en el İnstituto Cervantes, konvokadas de la parte de Esther Bendahan, jurnalista i produktrisa del program “Shalom” en la T.V Espanyola. Para la emisyon de este program, avlimos sovre el Judeo-Espanyol, muestro jurnal “Şalom” i “ El Amaneser”. Kero adjustar ke ya tuve la shans de ver este program una demanyana de Alhad, en el kanal de la sovredicha Televizyon.

En terminando, kero sitar la ultima ekspozisyon de Esti Saul. Entre las datas 12-16 de Febrero, la Munisipalidad de Estambol organizo el “Festival Mistiko Kultural” en la vyeja Eglisya Bizantina, “Aya İrini”. Este lugar antiguo se nombra tambien komo el “Muzeo Aya İrini”. En el kuadro de este evento espesyal, Esti Saul ekspozo 21 de sus ovras. Komo lo disho muestra amiga Klara Perahya, “...las ovras de Esti Saul son muy ekspresivas. Se syente ke la artista kijo azer parvenir un mesaje...”

Otruna vez Esti, esta deshando al espektador el yugo de deshifrar, kada uno a su manera este mesaje...