Kuatro demandas de los kompatriotos djudyos al Prezidente Abdullah Gül
Silvyo Ovadya prezidente de la Komunidad djudia tuvo una entrevista kon el prezidente de la Republika Turka, i le rogo de referarse al estatuto juridiko evropeo konsernando la kastigasyon de las insultas echas a los kompatriotos djudyos.
El Prezidente Abdullah Gül tomo nota de lo ke Silvyo Ovadya le demando i lo trankilizo a este sujeto. El le disho lo sigyente: Vozotros sosh muestros konsivdadinos en toda igualidad. Mozotros semos kontra todo modo de diferensyasyon. Varios eksesos pueden produzirsen, ma muestro govereno es muy sensiblo a esto
Silvyo Ovadya se topo tambyen en otras tres demandas, ke el formulo ansi;
• Se esta organizando reunyones de 300-400 personas adversaryas a los djudyos, de otra parte varios gazeteros estan formulando injuryas sin ser kastigados, es nesesaryo de azer lo menester en semejantes kavzos.
• Kual ke sea el djenero del rasizmo, si ay difikultades en la aplikasyon de varias leyes o byen si las kastigasyones formuladas no son sufizyentes, azer syertos trokamyentos, komo lo izyeron la Almanya, la Austria, la Fransya i los Estados Unidos.
• A la sigida de kualkyer formulasyon akseptavle de kesha, ya se esta avyendo prosesos kontra los ke kometen aktos de rasizmo, ma malorozamente eyos no parvyenen syempre a una konkluzyon. Sera oportuno si el djuzgo el mizmo los avre.
• Kuando los otores de un kulpa no son kastigados, eyos pueden de muevo kometer la mizma falta.
