Komo ya lo dishe la semana pasada en el chiko avizo konsernando el “Mistik Sanat Festivali” organizado por la Munisipalidad de Estambol, este evento fue un espasyo ande ombres i mujeres de kulturas i aspirasyones diferentes no solo se kruazaron en pasando, ma se enkontraron verdaderamente; kada uno avyerto al otro, aunke diferente, kon sus propyas karakteristikas i aspirasyones. Tres kulturas de epokas diferentes ke a la okazyon de este akontesimyento artistiko se toparon endjuntos.
No pude asistir a la avyertura del festival ni oir el koro de Antakya. Amigos ke se toparon prezentes me kontaron la sinyifikasyon profunda del ermozo grupo muzikal formado de partisipantes de relijyones i etnias diferentes, unidos por un syerto tyempo en una mizma fervor artistika.
Eyos me kontaron tambyen kel riko kokteil de inogurasyon tomo lugar en la sala ande fueron ekspozadas las pinturyas de Esti Saul, muestra kolavoradora en el mensual “El Amaneser’’.
Ke sea el produkto de una inspirasyon relijyoza o simplemente profana, klasiko o moderno, el arte tyene kaji syempre el poder de yevarmos en un mundo diferente, puede ser sin konsistensya materyal ma kapable de realizar en mozotros una sensasyon de kontentez indefinisavle.
Personalmente pude solo asistir a la klotura del festival ke me impresyono muncho… Antes de todo, un resivo muy kalorozo de la parte de los organizadores ke se topavan prezentes, sin ostentasyon ni palavras de byen venida pompozas, ma ande se sentia muncho mas ke un djesto de simple politesa...
En la sobriedad de la arkitektura de la grande Eglisya Bizantina, los sonidos de la muzika otomana, nostaljika i un poko triste, paresian ekspresar una koza indefinisavle, komo un sensasyon de aleshamyento de la realidad… I a dos pasos de la sala de konserto, la ekspozisyon de 21 pinturas de muestra korelijyonarya Esti Saul.
“La muzika otomana en una eglisya vyeja de 16 siglos” kon lado kon lado” pinturas modernas” produzian (a eyas tres) un efekto ekstraordinaryo, komo lo penso tambyen İzzet Kerribar
No se si las ovras de Esti Saul son modernas o post-modernas (mis konosensyas pikturales son muy limitadas) en todo kavzo eyas son muy ekspresivas …linyas i formas muevas ke paresen bushkarsen las unas las otras, kolores dulses aunke envezes kontrastantes, lo todo armonyozamente kombinado; en syertos lugares entre dos motivos abstraktos, una facha de ninyo o una simple letra de muestro alfabeto latino… Se syente ke la artista kijo azer parvenir un mesaje …por un momento el esprito del espektador se enkontro kon el suyo, ma kaji syempre kada uno topo lo ke el bushkava.
Diferente de las grandes kompozisyones figurativas klasikas o romantikas ke tyenen la mas parte de tyempo un sujeto byen definido, el arte abstrakto, el tyenen la vertud de ovligarmos a bushkar.
Sean kualo sean las diferensyas de djenero, fuentes de inspirasyon o objektivos de sus manifestasyones, el Arte en su totalidad tyene el poder de azermos bivir por un syerto tyempo en un mundo otro kel universo ande mos topamos aktualmente.
Lunes la noche, el 16 de mez de febrero 2009 bivi momentos de grande emosyon.
