La ventana de vuestra ermana /“LA REFORMA ULTİMA” (Son Devrim)

Şeli GAON Judeo-Espanyol
30 Ekim 2008 Perşembe

Vos kero avlar oy keridos lektores; del livro ke meldi : “La Reforma Ultima” (Son Devrim), eskrito por la jurnalista NÜKET AŞKIN; ke investigo (araştırdı) kon muncho detalyos la reforma de la universita en1933, la Universita de Estambol, (İstanbul Üniversitesi).

Es un lavoro ande investigo; las reushitades i las problemas de esta reforma.

“La Reforma Ultima” es una ovra muy emportante, porke despues de 1933; no uvo otra reforma tanto aktiva (etkin).

La partikolaridad de esta reforma de 1933 era; ke los djudyos, las personas de sensya (bilim) ke se fuyeron de Hitler; fueron envitados a Estambol kon la desizyon de Atatürk, i trusheron la sensya i la mentalidad de la sensya (bilim zihniyeti) a la universita.

Esta reforma era la ultima reforma de Mustafa Kemal Atatürk.

Munchos profesores djudyos; en el espasyo de la sensya, literatura i arte; fueron ovligados de fuyirsen de sus paises.

 

En el mizmo tyempo; en la Republika Turka manseva aviya una ambyertura por los ombres de sensya.

La tirania (zulüm) de Hitler; izo naser la okazyon a la Turkiya ke estava asperando.

En oktobre 1933; 400 profesores aviyan vinido a la Turkiya para ensenyar la ekonomiya, la medikeria, el derecho (hukuk), la kimika (kimya), el urbanismo (şehircilik), i otras branches emportantes de la literatura, de la musika i del arte.

En los anyos 1940; estos ombres de sensya trusheron a l’Anatolia la opera, la vals, i la musika klasika.

Este desvelopamyento (gelişme) ke troko enteramente la figura (çehre) de l’Anatolia; djugo un rolo emportante en el desvelopamyento de la amistad (dostluk) entre los Almanes i los Turkos.

Entremientes; Hitler kuando se ambezo ke Atatürk aksepto a su pais a los profesores ke el arrondjo; se inyervo muncho i lo amenazo en dizyendole :

“No akseptej a estos profesores komunistos a vuestro pais”.

Atatürk; al kontraryo los arisivyo kon una atansyon perfekta i los envito al balo del dyezen anyo de la fondasyon de la republika turka.

En la mueva Universita d’Estambol ke se avyo kon seremoniya en el 18.11.1933 aviya 180 profesores, ke la mas grande partida eran almanes. Eyos izyeron ganar a la universita una biblioteka rika.

Aviya i medikos (doktor) alavados. Uno de eyos fue el pionaryo (öncü)  del ospital Cerrahpaşa ande aviya 200 kamas para hazinos, amfis para seminaryos kon los elevos i salas de operasyon.

Este desvelopamyento ke tuvo lugar en los anyos ultimos de Atatürk; kultivo el pais en todo modo punto de vista. Grasyas a estos profesores etranjeros, ke la universita gano su personalitad  i avanso muncho fina el diya de oy.