El faktor rasyal en la eleksyon Amerikana

Klara PERAHYA Judeo-Espanyol
15 Ekim 2008 Çarşamba

Asta ke grado la rasa blanka se libero de los vyejos prejuisyos rasyales? difisil de pueder responder a esta pregunta.

Kual ke sea el grado de adelantamyento i de sivilizasyon de una persona, keda munchas vezes en su korason komo "un espanto del otro", "de lo ke lo desferensya de este otro", una falta de konfiansa atavika ke le vyene del tyempo leshano de sus avuelos, el temor de entregarse puerpo i alma al azardo.

 Ansi, segun lo ke meldimos en la prensa, aunke syempre adelantre en los sondeos, la viktorya de Barack Obama no es segura, por la simple razon ke el es de kolor bruna. El faktor rasyal es uno de los puntos los mas sensibles de la aktual eleksyon Amerikana, sovre todo para una grande kantidad de elektores ainda ezitantes.

En referensya a un vyejo kavzo rasisto ke (ay de esto munchos anyos) avia impedido la eleksyon de un governador de grande valor, por la sola razon ke el no era blanko, una teoria nombrada "el efekto Bradley-Wilder" pretende ke  munchos elektores (ke durante el sondeo afirman tener la intisyon de votar por Obama afin de no ser konsiderados komo rasistos)  puedran abstenersen de votar o byen votaran por McCain.

En un byervo, el avantaje de Barack Obama en el sondeo es suseptible de despareser el dia mizmo de la eleksyon.

Por seguro esto es una teoria bazada sovre supozisyones...los debates no mankan en la prensa eskrita o vizual...tambyen no mankan las akuzasyones verdaderas o falsas, las kalolmnias i las difamasyones.

Epoka triste en los Estados Unidos, kriza finansyera de mas a mas difisil a metrizar, problemas al pareser sin solusyon, promesas irrealizavles, kandidatos ke se arrebashan los unos los otros... elektores indesizos o al kontraryo enfokados sovre argumentos sin konsistensya... rumores echas de temor i vyejos prejuisyos, rumores por la mas parte no konfirmadas...

Terrivle, lo ke el espanto puede falsar el djuzgamyento.

Lunes el 13/10

Segun los kotidyanos elektronikos Fransezes "Le Figaro" i "Le Point", Dominique Strauss-Kahn direktor aktual del Fondo Monetaryo Internasyonal (FMI),ekonomisto mundyalmente byen konosido i muy apresyado por la kalidad de sus djuzgamyentos, manifesto una syerta konfiansa en la rezolusyon de la kriza finansyarya ke mete en este momento el mundo en una situasyon de temor jeneral. 

El disho ke,al pareser, el punto kulminante de la kriza se topa detras de mozotros i ke, kon una intervensyon fuerte i kolektiva, la konfiansa puedra revenir.