Ninet BİVAS
Algunos pueden dizir supertisyon ma los Judyos en akordo kon la tradisyon Judiya kreyen empesar el muevo anyo en komyendo syertas kozas ke sembolizan la protekson de ojo malo, vida buena i estar bueno enfrente del Dyo. Las istatistikas mos endikan ke en el mez de Tishri, el primer mez del anyo muevo los İsraelyanos komen mas muncho pishkado, miel i mansanas ke los otros mezes del anyo. La relijiyon Judiya enkoraja a sus miembros a komer estos produktos en la esperansa ke va ser bien por el anyo vinyendo. Rosh Ashana es konsiderado komo un buen tiempo para azer un muevo empesijo. Tomar desizyones para una vida mijor es una parte de esta fiesta.
Unos de los semboles es komer pishkado ke es konsiderado komo una buena manera de empesar el anyo. Estaremos syempre a delantre komo la kavesa del pishkado i no alkavo komo la kola.Los pishkados debasho de la mar no se ven por dingunos i pujan en kuantitas.
La miel es un otro sembol pozitivo. La tradisyon es de untar mansanas aryento de la miel en el buto ke el muevo anyo se aga dulse komo la miel i la mansana. La miel es mensyonada en la Tora encuntos kon la tierra de İsrael. La miel eskrita en la Tora es miel de datiles.
Komer la mansana semboliza muestra esperanza ke el Dyo moz va kerer bien.Es uzo de komer tanbien agranada(nar) donde los 613 granos koresponden a las 613 mizvot.
Anyo dulse i paz en el mundo.
