La ventana de vuestra ermana

Şeli GAON Judeo-Espanyol
24 Eylül 2008 Çarşamba

Tres evenementos emportantes

La semana pasada asistimos kon mi marido; a tres evenementos emportantes en el sujeto de la unyon, solidaridad i relasyones de la kerensya entre las relijyones, los umanos  i los paises.

Estuvimos envitados a un İftar (kortadura de ayuno musulmano); ande se topavan todos los represantantes  de las relijyones; musulmanos, gregos, ermenis, suryanis, keldanis, djudyos, latinos i personas, famiyas ke apartyenen a estas komunitades.

El punto emportante de esta nochada era: “Por kreyer un avenir yeno de pas i de repozo”. Las avlas ke uvo eran enriva de la tolerensya, de la unyon i del respekto.

“El prinsipyo es ke; Azeremos todo el posivle para ser respektuozos a la pozisyon de todos mozotros, amar la umanitad mizmo ke muestras kreyensas son diferentes”.

Estamos bivyendo aki, en la Turkiya ande la amistad, i la unyon son  una luz de esperansa. Muestro buto es de bivir endjuntos; kon kerensya, kon pas, kon djustisya i kon  piadad.

Estamos komyendo endjuntos, bivyendo endjuntos, i puedemos depasar todas las difikultades si tenemos la veluntad, el dezeo de ser komo ermanos.

Muestro dover es de transmeter esta ahadut (birlik) a las jenerasyones vinideras.

Esto es nesesaryo por la seguridad de la umanidad.

Ser endjuntos, envitar a las personas, mostra la fraternitad, la ermandad.

Partajaremos muestra fey (iman); kon la ayuda, kon la aksyon, aktividad, i ermozuras. Muestro buto deve de ser la pas en el mundo entero.

Fue una nochada reushida,las ideas, las avlas  los tratamyentos estavan mas de bueno. Lo ke es de arrogar; es ke seyga  sentimyentos verdaderos, ke vyenen de aryento del korason; todo lo ke se avlo; ke se pueda aplikari pratikar.

Tres diyas despues, asistimos al konserto de Sarit Hadad; un konserto mirakoloso. Sarit Hadad  la famoza artista de la musika israelyana, la reputada por todo el mundo; vino a muestro pais solamente por un konserto. Yıldırımspor organiso esta nochada ekstraordinarya en un otel ande aviya mas de mil personas.

Mansevos, aedados, ombres, mujeres, muncha djente.

Eya es una artista, una de las mas famosas ke egziste en İsrael. Su nombre es: “La Prensesa de la Musika del Oryente (doğu müziğinin prensesi).

Manseva de 29 anyos bien konosida en la Evropa, i Amerika; gano munchos premyos, i dyo munchos konsertos en el mundo entero.

La primera ves ke vino komo envitada a la Turkiya, estuvo muy emosyonada de sentir la kayentor del puevlo djudyo; i muy orgolyosa de esta envitasyon.

Eya muy modesta, salyo a la shena; kon un pantalon preto i una kamisa blanka sin hadras i baranas. Una boz maraviyoza, ke kere partajar la felisidad (mutluluk) kon todos.

El grande rabino Rav. İsak Haleva; a la fin del konserto le offryo un buketo de rozas en remersyandola i en dizyendole; ke eya trusho la alegriya a muestra komunitad.

El 21.09.2008 Alhad; despues de midi, asistimos a la seremoniya de sinyatura del livro de rekuerdo (anı) del Presidente de Onor de muestra komunitad Bensiyon Pinto.  En el livro “Anlatmasam Olmazdı”; Bensiyon Pinto eskrivyo las eksperyensas, en el enterval de su vida; sus memoryas de la perioda kaji 15 anyos ke fue el presidente konosido i amado de la komunitad djudiya de Estambol. El se konsakro a su komunitad i a su pais; kon Kerensya, kon Otoritad, kon Kapachitad, kon Piadad, kon el kerer ayudar a las personas ke tyenen menester de el, en mostrandoles kaminos, en allumbrandolos kon sus ideas djustas, en solusyonando las difikultades, i en konkluindo (sonuçlandırmak) los problemes en todo modo punto de vista.

En este livro; el konto : su chikes, su manseves, su famiya kerensyoza, madre, padre, mujer, ijos, inyetos i otros evenementos...

Una de las kozas ke me plazyo muncho es; en el empisijo del livro lo ke eskrivyo por su mujer .

“Eti Pinto: mi mujer, la amiga de mi kamino, mi alliada (dost) i la mujer ke kero byen; ke aseguro mi vida para ke seyga una vida verdadera”...

Estas palavras mostran; ke es una persona sentimental, i muy atado a su famiya.

El metrizo (hakim olmak) a su entorno.

Syempre koryo al menester de su entorno; lavoro, peno kon muncho kerer, kon ardor; tuvo relasyones muy emportantes kon los grandes presidentes del pais.

En estos 15 anyos ke lavoro por la komunitad; muestra komunitad gano muncho, porke el se dyo  de kadiv i alaha (enteramente) a azer buendades i solusyonar los problemes entrifikados. Kon su avla sinsera, i djusta; resolvo munchos evenementos emportantes por la favor de la komunitad.

Su vizyon sosyal syempre fue muy ancha.

Syempre tuvo kontaktos kalorozos kon su entorno.

En un otel ande fue esta seremoniya; todos los prezidentes de la munisipalidad (belediye) de Estambol; komo Kadir Topbaş, i de la munisipalidad de Beyoğlu, Adalar, i otros, profesores, jurnalistos, muncha djente de la komunitad djudiya, los ke lo keren byen i munchos mansevos asistyeron; por merkar el livro, azerlo sinyar i Onorar a Bensiyon Pinto.

Kero ogurar a todos Shana Tova, un anyo muevo yeno de salud i kozas buenas, Rosh-Ashana alegre; i munchas felisitasyones a “Bensiyon Pinto” por el livro ke eskrivyo kon muncho Koraje.