Komemorasyon del rekuerdo de Eti Telvi
Lunes el 15 del mez koryente el rekuerdo de Eti Telvi, grande Dama de muestra kolektividad, fue komemorado por sus amigos i kolaboradores en la tristeza i un grande respekto.
Eti Mizrahi Telvi nasyo en Estambol, estudyo en la High School de muestra sivdad i en 1970 auno su vida a la de Jak Telvi. Eya era la madre de una ija Mirey Roditi i de un ijo Nedi Telvi ansi ke la avuela de Teri, Yael, Jaki i Klodya.
Eti era una persona syempre sonriente ke lavoro kon ardor i asiduidad en diferentes ovras de muestra komunidad, komo la Sedaka Umarpe el Orfelinato etc...
Eya se topo por una largo momento a la kavesa de un grupo de damas todas voluntaryas, konsakradas al ayudo umanitaryo.
Su rekuerdo kedara syempre bivo en la memorya kolektiva de muestra komunidad i su nombre gravado en munchos korasones.
Ke su Alma repoze en Paz.
Ke syempre se selebre Bodas,
Barmitzvas i Birkamilas sovre la
Teva del Kaal Neve Şalom
Desde unos kuantos anyos La Keila Neve Şalom es prinsipalmente konsakrada a akontesimyentos komunitaryos yenos de alegria. Ansi la semana pasada el 7/9 fueron selebradas las seremonias matrimonyales de:
Renin Halegua - Kaan Varnalı
Sibel Benveniste - Alper Biçaço
Flora Gerşon - Izzet Levi
i
Alhad pasado el 14/9 se fyestaron las bodas de:
Karen Kohen – Berk Termin
Netsi Bahar – Melih Çavlı
Luiza Soryano – Erol Malki
Los kualos aunaron sus destinos para una larga vida de felichita, kerensya i prosperita.El Dyo ke los bendiga. Muestras sinseras felisitasyones a las famiyas en fyesta i muestros mijores dezeos de kontentez a los rezin kazados.
La Fransya syempre
vijilante, syempre
pronta a intervenir en kavzos de antisemitizmog
La semana pasada tres adolesentes djudyos kon kipa en la kavesa fueron asaltados en un baryo de Paris, por un grupo de mansevos de otra relijyon i fuertemente maltratados por eyos.
La Polisia koryo immedyatamente a sus ayudo ma los malazedores ya avian entretyempo fuido.
Sin deskorajarsen, despues de aver yevado los tres adolesentes parsyalmente ferridos al ospital, las fuersas sivikas se metyeron a la bushkida de los atakantes.
6 mansevos se topan en este momento en estado de arrestasyon.
Seremonia de Tefillim en el Kaal de Ortaköy
Djuevez pasado en la ermoza Keila de Ortaköy se selebro kon emosyon i alegria la seremonia de Tefillim de:
Cem Gormezano i jo de Deniz i Nedim Gormezano.
Ombre de buena ventura ke el sea , mazalozo i provechozo para su Famiya, su Komunidad i su Payiz. Todas muestras felisitasyones a la famiya Gormezano.
Un inyeto en la famiya de Nita i İzel Rozental
Nita i muestra kolovorador i amigo, el karikaturisto byen konosido İzel Rozental vyenen de gostar a la alegriya de ser los avuelos de una ermozo ijiko.
Ke su vida se alegre i prospera yena de kontentez i kerensya.
Dia de sinyatura del livro: "Anlatmasam Olmazdı" Geniş Toplumda Yahudi Olmak
Tenemos el plazer de advizarvos ke dia de Alhad el 21 del mez de septembre "Bensiyon Pinto" prezidente onoraryo de muestra Komunidad ve sinyar su livro intitulado:
"Anlatmasam Olmazdı - Geniş Toplumda Yahudi Olmak" en el Sofa Hotel ART 8 lounge - Teşvikiye Cad. No 41.
