La komunidad judiya de Turkiya, este anyo, va selebrar, por la ochena vez, el Diya Evropeeno de la Kultura Judiya, diya de Alhad, el 7 de Septembre, en la zona Galata de Estambol.
El tema del evenemiento de este anyo va ser la muzika judiya. Diya entero, va aver diversos konsiertos i demonstrasiones de nombrados artistos i muzikos judiyos.
El objektivo de este diya es de prezervar la kultura i la erensia judiya. Este diya va reprezantar, tambien, un paso emportante en destruizando el malentendimiento relijiozo ke aze sufrir las minoritas etnikas. Este diya es partikularamente emportante en muestro pais, porke los judios i la kultura judiya, aki, no son bastante konosidos.
El Diya Evropeeno de la Kultura Judiya, kada anyo, se selebra en trenta paizes evropeenos, el primer Alhad de Septembre. Este anyo, en muestro pais, va aver festividades kulturales, ekspozisyones, konferansas, diskusiones en forma de panel, demonstrasiones de dansas. Uniko para la selebrasion de este anyo, va aver una imitasion de boda judiya ke se va fiestar en la Sinagoga Neve Shalom.
Los evenemientos i las aktividades de este diya vana tomar lugar en diversas Sinagogas, en el Muzeo Judiyo, i en el Sentro Kultural de Galata. Galata fue una zona emportante de los judios turkos en el dizimuevien i ventien siglos.
Las aktividades vana empesar a las onze de demanyana. Komo este evenemiento, este anyo, kayo en el mez de Ramazan, una komida de Iftar se va dar en la Plaza de Galata a las siete i media de la tadre, komo un sembolo de unitad entre las kulturas.
Entre las konferansas de este anyo, va aver un panel, en el Sentro Kultural de Neve Shalom, sovre los Sientifikos Judios Almanes, ke kontribuaron a la Reforma de las Universitades Turkas, en el anyo 1933.
El lider de este panel va ser Mesut Ilgim, un miembro de la administrasion de la Universitad de Yildiz. Duspues ke se retiro de la Universitad de Yildiz en el anyo 2001, Mesut Ilgim izo una grande investigasion sovre este tema.
Grandes aparejos sovre este evenemiento emportante estan kontinuando en muestra komunidad. Esperamos ke va ser un diya ermozo, reushido i ke va aver grande partisipasion por pueder arivar a muestro butto.
