Una ermoza boda en una atmosfera de alegria, kerensya i amor
Alhad primo del mez de Febraro, una ermoza boda fue selebrada en una atmosfera de alegria, kerensya i amor.
Suzi Abuaf i Lior Kohen adjuntaron sus destinos para una larga vida ande sera fraguada una ermoza famiya yena de felisidad, armonia I entendimyento mutual.
El Dyo ke los bendiga.
Todas muestras felisitasyones i muestros buenos dezeos a las famiyas Abuaf i Kohen.
Roketas son ainda travadas sovre Israel a partir de Gaza por los militantes del Hamas
Segun lo ke eskrive la prensa Franseza, Ehud Olmert deklaro ke la replika Israelyana a las roketas ke kontinuan a ser travadas sovre el terrritoryo Israelyano por el Hamas malgrado el akordo de “halto el fuego” (ateşkes) sera muy fuerte; el disho ke esta replika intervyendra al momento , en el lugar i de la manera ke Israel va eskojer
En efekto, la armada Israelyana bombardo munchos lugares estratejikos en en el sentro i el sud de la banda de Gaza la noche entre Alhad el 1/2 al Lunes demanyana el 2/2, en repuesta a los tiros del Hamas ke firyo tres Israelyanos.
Munchos tuneles entre la banda de Gaza i el Ayifto fueron destruidos i un posto de seguridad del Hamas danyado.
No uvo viktimas umanas…
Repuesta immedyata de lijitima defensya
Un palestinyano fue matado Lunes el 2/2 por soldados Israelyanos en estado de lijitima defensya, en el sud de la Sijordania.
El ombre estava armado i avia travado en direksyon de una patrulya Israelyana serka de un baraje militaryo.
Un portevos militaryo Israelyano konfirmo ke los soldados avian resivido golpes de tiros antes de ripostar.
