En estos primeros dias del anyo 2009; dias veramente ariskuros i yenos de difikultades, en el punto de vista ekonomiko i politiko; kero eskrivir un kuento; ke penso va ser una kura para mozotros.
Aviya un rey en un tyempo, el muy riko ke todo el mundo saviya su rikeza.
Este rey; se yevava una partida de su trezoro (servet) ande se iva; i se glorifikava de ekspozar (sergilemek) este trezoro.
Mizmo ke teniya munchas personas en el doredor, teniya un aliado (dost) savyo ke se fiava (güvenmek) solo a el.
Un dia ke estavan avlando endjuntos; el rey demando una kestyon a su amigo.
“Kero tomar tu idea sinyor savyo; kualo estas pensando sovre mi, i sovre mi tresoro?”
El savyo; mirando aryento de los ojos del rey, le disho:
“Dizeremos, sinyor rey; ke estas en un dizyerto kemando del sol i vasto; para no murirte si te do un vazo de agua kon una kondisyon; puedez dar la miyata de tu tresoro para la agua?”
“Siguramente” respondyo el rey.
“Dizeremos ke tu sekura (susuzluk) pujo, te va dar otruna kupa de agua, i por esta agua vas a dar la otra partida de tu tresoro?”
El rey penso un poko; i “para no murir” disho si.
Alora disho el savyo en riyendo:
“Honorable rey; tu tresoro es kompuesto (ibarettir) solamente de dos kupas de agua.”
Todos mozotros; puedemos posedar unas syertas identitades (kimlik), rikezas, fortunas en muestra vida.
Puedemos ser avokatos, doktores, lavorantes, patrones, madres, padres...
Todos posedamos unas egzistensyas (varlık), i rikezas propyo a si mizmo.
Por egzempiyo; para unos, la rikeza es de tener rubis, (yakut), esmeraldas (zümrüt), munchas djoyas, para otro posedar una biblioteka yena de livros enteresantes es la rikeza, i para otros bivir en una kaza chika kon sus ijos i inyetos es la mas grande rikeza ke egziste en la vida.
Para unos, kaminar a pye deskalso en el bodre de la mar, espandirse en las vedruras para ver el amaneser del sol, es una rikeza ke no se puede alkansar.
Todos pensan de una manera diferente.
Bueno; en verdad kualo es la Rikeza?
La rikeza puede ser kompuesta solamente de dos kupas de agua?
La rikeza es un kontentamyento, es el artamyento ke troka de persona en persona. Lo ke es emportante es; kontentarse (tatmin olmak) en el meoyo (zihin).
La rikeza verdadera no es posedar muncho, ma sintir el menester de kozas pokas.
Una amiga keriya merkarse un fostan muevo para una resepsyon. Se aviya aparejado i la moneda ya estava pronta. Ma, en un punto todo se troko.
Akel diya vido una kriyatura en la kaye i se adjideo. Akel momento se arrepintyo de merkarse el fostan. Kon esta moneda; le merko a la kriyatura todo lo ke teniya menester por la eskola; vistimyentas, livros...
Eya se kontento de azer esta mitsva. Render orozo al den frente kon su famiya, la repozo i la rendyo oroza.
La Rikeza verdadera es bivir sin ver lo ke posedamos. Es azer buendades, ayudar a los menesterozos i okuparse de las byenfesensyas.
La Rikeza verdadera es bivir, en mirando abasho de mozotros i no los ke estan ariva de mozotros.
La mas grande Rikeza; es remersyar a la vida, es dar loores (şükretmek), es agradeser.
Para ke una persona pueda bivir, no tyene menester de dinguna bevyenta mas ke la agua.
Si la baza es de kontinuar la vida; la rikeza es kompuesta solamente de dos vazos de agua.
Vos oguro una vida satisfasyente (tatminkar), kon salud, pas i amor en el mundo entero.
