Una boda, una unyon por syempre
Alhad el 25/01 de muestro anyo de alegria:
Leyla ipekçioğlu i Metin Levi
aunaron sus destinos para una larga vida de amor, kerensya i armonia.
El Todo Poderozo ke bendiga sus unyon.
Todas muestras felisitasyones a las famiyas İpekçioğlu i Levi.
Palavras rekonfortantes de la parte de Barack Obama
Segun el djornal elektroniko del semanaryo fransez byen konosido “Le Nouvel Observateur” del 23/01/2009: Barack Obama afirmo kel Hamas deve inchir las kondisyones sigyentes: El deve rekonoser el derecho a egzistir de Israel, renunsyar a la violensa i respektar los akordos pasados.
En repuesta, el Hamas djuzgo yerada la politika de Obama.
Litijyo entre la komunidad Judia de Italya i el Papa Benoit XVI
La komunidad djudia de Roma protesto kontra la reabilitasyon de kuatro prelatos ke avian sido ekskomunyados por el Papa Paul 2. El uno de entre eyos avia sido aleshado de la Eglisya por razon de negasyonizmo , el avia nyegado la muerte de 6 milyones de Djudyos en las kamaretas a gaz.
Verjel İşman i Meri Schild pyedreron sus padre
Es kon tristeza ke mos ambezimos la muerte de Lazar Abuaf padre ansi ke esuegro de Verjel & Selim İşman ansi ke de Meri & Robert Schild. Ke su alma repoze en paz.
Muestras sinseras kondolensyas i la ekspresyon de muestros sentimyentos yenos de amistad a su mujer, a Verjel i Meri ansi ke a Selim i Robert.
