Shabat el 24 del mez koryente, despues de medyo dia, la sala de resepsyon del Şalom estava yena, no de oditores kombidados a la okazyon de una konferensya o por kualkyer otro motivo, ma de la totalidad de los ke, en varios kampos de aktividades, son afilyados de leshos o de serka a la publikasyon del semanaryo en lingua Turka kon una pajina en Judeo Espanyol..
Los heroes de la djunta eran se entyende byen el avokato Yakup Barokas prezidente salyente del konsilyo de administrasyon de la gazeta i Ivo Molinas elijido muevo prezidente del mizmo konsilyo.
La asistensya era kompuesta en prioridad de mansevikas i mansevikos i tambyen de maduros de todo modo de edad, de personas aedadas entre aproksimativamente 20 asta mas de 70 o 80 anyos.
Atmosfera muy dulse echa de amistad resiproka, de kudyo los unos por los otros, de alegria de toparsen todos endjuntos i sovre todo de ver karas muevas komo una promesa de lonjevidad.
Mas ke una transmisyon de prezidensya o de poder, esta djunta era la transmisyon de bandyera de ermano a ermano, la transmisyon de una karga santa, en el mezmo eskopo i por el mezmo olbjetivo de verdad.
Yakup Barokas kedara syempre al seno de la aktividad del Şalom, kon su potensyal de refleksyon, la kualidad de sus analizes i su eksperyensa vyeja de dyez anyos durante los kualos el tuvo a rezolver problemas bastante difisiles.
İvo Molinas tambyen trae kon el, la grande eksperyensa de largos anyos de lavoro en la administrasyon del Şalom, su posto de shefe redaktor de la gazeta i igualmente su prezensya en tanto ke myembro aktivo en el konsilyo Laiko de muestra komunidad, sus artikolos korajozos i byen estrukturados, enfin kon su dinamizmo i su vitalidad personal.
Dos ombres ke kolavoraron i partajaron durante anyos la mizma koluna de los “artikolos de fondo” del Şalom, kada uno kon la profundura de su manera de pensar, syempre kon un esprito avyerto, pronto i apto a oir lo kel otro dize i propozar …dos amigos, dos ermanos.
Esta djunta fue dirijida por “Maurice Levi” koordinador administrativo de la gazeta. El izo el elojyo byen meresido del prezidente en partensya, de sus kualidades de giador i de responsable de edisyon del ebdomadaryo durante numerozos anyos; el tambyen avlo de la valor inkontestavle de Ivo Molinas ke lo va remplasar en este posto de komanda..
A su torno, Yakup Barokas tomo la palav ra i formulo su sinsera gratitud enverso todos los ke lo ayudaron en la realizasyon armonyoza de su largo mandato. El nombro i partajo la alegria de la resushita kon todos sus kolavoredores, empesando por “Silvyo Ovadya”, “İvo Molinas”, “Tilda Levi, koordinadora de la publikasyon”, asta kada una de las sekretaryas.
En mizmo tyempo el izo el elojyo de su mujer Nelly, la kuala lo ayudo no solo kon su prezensya tan dulse ma tambyen en partajando kon el, el kontrol de kada artikolo ke devia ser publikado. I kon muncho esprito humoristiko el mos konto syertos chikos akontesimyentos ke mos izyeron todos riir.
Tomaron tambyen la palavra: El aktual Prezidente de muestra komunidad Silvyo Ovadya ke presedyo Yakup Barokas en la direksyon del Şalom, Tilda Levi koordinadora de publikasyon, Ester Yanier, responsavle de la pajina de novedades interyoras i otros, los kualos ekspresaron sus profunda afeksyon por Yakup i sus kerensya por İvo.
El siklo de las avlas fue kloturado por Ivo Molinas el mizmo ke igualmente izo el elojyo de su predesesor I formulo tambyen su desizyon i dezeo de syempre luchar para kel Şalom vaya de diya en diya mas adelantre.
El byervo ke fue lo mas pronunsyado fue famiya “Şalom ailesi” este termino es afektivamente muy kayente i ekspresa la fuersa ke tyene la unyon.
Un proverbyo djudyo el kual (segun lo ke meldi en un livro) es orijinaryo de la epoka de Platon, dize: “una mano lava la otra” i muestros avuelos adjuntaron “…i las doz lavan la kara”.
Vvyeja sagasidad de muestros antepasados, ke kedo biva i mizmo muy aktual. Eya asegura ainda mas la perenidad del puevlo djudyo...
