Nasimyentos en la alegria i la azlaha
Dos ijos, dos varones nasyeron en las kazas de: Sarah-Nedim Kohen ke fue nombrado Yitshak I Aylin-Doğan Levi ke fue nombrado Mark. Ombres de buena ventura ke devengan, mazalozos i provechozos para sus Famiya, sus Komunidad i sus Pais.
Una ermoza realizasyon artistika
Djuevez pasado la tadre, el 15 del mes koryente, una ekspozisyon de pinturas echas por ansyanas elevas del liseo N.D.S., fue realizada en la eskola mizmo, en el muevo salon dedikado a las manifestasyones artistikas i literaryas.
La atmosfera era partikularmente dulse, yena de konvivyalidad i de grande emosyon, sovre todo de la parte de las vyejas kompanyeras de klasa de toparsen de muevo endjunto en una mizma aspirasyon i un mizmo esforso de trespasar las chikas o grandes visisitudes de la vida de kada dia.
En los tablos ekspozados la mizma bushkida de un mundo mas luminozo, emosyonalmente mas riko en aspirasyones i puede ser ansi mas umano i mas sinsero... linyas muevas, motivos muevos, simbolos muevos, la nostaljia de un mundo pedrido i por seguro el intenso dezeo de un mundo muevo kon otras ideas i otros sentimyentos.
Todas muestras felisitasyones a las partisipantes: Alev Suçsuz Bilgin, Arusyak Tırpancı Özfuruncu, Beki Benhabib Bennun, Bilge Kum, Bilge Narmanlı Alkor, Emine Sılan, Ester Benhabib Benbanaste, Ester Yaeş Saul, Figen Yılmaz, Filiz Karsan, Füsun Çuhadar Eskiyerli, Hilda Yosmayan Jacquinot, Hüma Birgül, Irmak Özcan, Nazlı Tayman, Nelli Gavrieloğlu, Nelly Kori Güler, Ruken Aslan, Sedef Atabek, Selma Albağlı Deleon, Sevinç Çifçi Özduman, Verda Baruh Habib.
Esta ekspozisyon kedara avyerta asta el 26/1/2009
Muevas alegrias en muestra komunidad
Si, muevas alegrias en muestra komunidad i syempre sera ansi.
Alhad, dia luminozo portador de buenos simanes, dia dedikado a bodas i gozo, se selebro la unyon por syempre de:
Beki de Molho kon Bülent Levi i tambyen de Cenya Abudaram kon Albert Mizrahi.
Ke la Bendisyon de los Syelos los akompanye syempre en la felisidad, el amor i la armonia.
Todas muestras felisitasyones a las famiyas De Molho & Levi ansi ke Abudaram & Mizrahi i muestros sinseros dezeos de alegria a los novyos.
