Grande mijoria en el estado de salud de Sabi Beraha
Loores al Dyo, el estado de salud de muestro kerido amigo Sabi Berah se esta mijoreando de dia en dia. Ke el Todo Poderozo lo guadre syempre de todo modo de mal ...Refuah kumplida a el i a todos los ke se topan en situasyon de difikultad.
Bar Mitzva de Yoni Pinto
Shabat demanyana fue selebrada en la emosyon i en una atmosfera de dulse alegria i kerensya, la seremonia de Bar-Mitzva de Yoni Pinto Ijo de Megi & Benjamin Pinto i inyeto de Ceni Kohen ansi ke de Eti & Bension Pinto prezidente onoraryo de muestra komunidad.
Kel Dyo Baruhu lo bendiga i ke su futuro sea briyante, yeno de buenas realizasyones, provechozo para su Famiya, su Komunidad i su Payis.
Muestras sinseras kongratulasyones i muestros dezeos de felisidad a Yoni ansi ke a las famiyas Kohen i Pinto.
Israel en gerra kontra el Hamas
Desde Shabat demanyana Israel se topa en estado de gerra kontra el Hamas.
El anunsyo de una gerra es syempre un evento trajiko i no es posivle de no pensar immedyatamente a la multitud de mansevos (de ke kampo ke sean) ke riskan de pedrer la vida.
De ora en ora la situasyon parese azerse mas dramatika. Segun lo ke dize la prensa internasyonal, el objetivo immedyato de Israel en empesando esta ofensiva es de meter fin por syempre a los tiros de roketas sovre su territoryo i de destruir los tuneles ke permeten el enkaminamyento, en kontrabanda, de armas i minusyones a destinasyon de Gaza.
Este objetivo munchas vezes mensyonado de la parte de los responsavles Israelyanos devyene de mas a mas urjente a realizar, visto kel Hamas i los grupos armados Palestinyanos paresen tener la kapasidad de embiar roketas ke pueden alkansar butos de mas a mas leshanos.
Desde el retiro Israelyano de la banda de Gaza en el anyo 2005, miles i miles de roketas fueron tiradas verso Israel, en grande mayoridad roketas Qassam ke kavzaron sovre todo danyos materyales.
Estos ultimos mezes roketes del djenero Grad i Katioucha fueron tiradas i alkansaron sivdades Israelyanas de mas a mas leshanas, lo ke konstitue un grande peligro por los sitizanos.
Tzipi Livni deklaro ke no se trata de okupar el territoryo Palestinyano ma de enforteser la seguridad del puevlo de Israel.
Kualas ke sean las razones, una gerra es un akontesimyento triste ande los dos kampos fatalmente pyedren.
