La tradisyonal selebrasyon de Hanuka fue realazida Alhad pasado el 21 del mez koryente, en Manhatan, por la AFTJ (American Friends of Turkish Jewry) en prezensya del Konsul Turko Başar Şen i de su famiya ansi ke de una grande asistensya kompuesta mayoritaryamente de djudyos orijinaryos de Turkia, aktualmente moradores de New-York, New Jersey i Connecticut.
Los personajes los mas importantes de la noche syendo los ninyos, la mas parte de las aktividades eran sentradas sovre eyos. Ansi las festividades empesaron kon kantikas de Hanuka dichas en Ladino por ijikas i ijikos de varias edades, al entorno de un gitaristo ke los akompanyava i los giava.
La nochada kontinuo kon un pranso ande fueron servidas komidas Turkas i Sefardis aparejadas kon fidelidad i kudyo.
En su diskorso de byen venida, Dr.Vitali Franko prezidente de la AFTJ mensyono las aktividades ke fueron realizadas i las ke seran kumplidas en un futuro serkano. Ansi, el anunsyo la planifikjasyon de una projeksyon del filmo “El ultimo treno” en el Konsolato Turko de New-York durante el mez de Febrero.
El rengrasyo todos los ke asistyeron a la fyesta i partikularmente Suzette Acar, Zivet Doenyas-Price i Esther Roth por sus presyoza partisipasyon al lavoro jeneral, ansi ke los administradores del Hotel Flat i todos los ke tuvyeron la jenerozidad de azer donasyones.
A un syerto momento, una de las estreas de la nochada Laurie Levi tomo el mikrofon i avlo al sujeto del liseo Ulus Musevi Okulu. Tambyen Hana (13 anyos) i su ermana kontaron la historya i la sinyifikasyon de Hanuka.
Las dos primeras kandelas de Hanuka fueron asendidas por el Haham Nesim Elnekave i el prezidente Vitali Franko.
I despues de la distribusyon de regalos, funksyon asumida por Esther Roth, se bevyo kave i se komyo, komo es de tradisyon, dulsuryas Turkas kon kaymak.
Ansi termino la ermoza nochada de Hanuka de muestros konsivdadinos instalados en esta parte de la Amerika, en la alegria, la paz i la kerensya mutual.