En el kaos de une mundo dominado por la lokura de una voluntad de potensya sin fin i la fayita de un sonyo de estabilidad irrealizavle... en un konteksto sosyal ferido en sus entranyas por problemas ke puede ser no seran nunka rezolvidos, persisten unos kuantos oazises de paz ke paresen guadrar la serenidad de lugares ande reyna ainda la dulsor del karinyo mutual...
Eyos son unas de las mas grandes valores de muestra komunidad: El-Orahayim, el Azilyo de vyejos, la Michne Torah el Orfelinato, la Matan Baseter, la Eskola, las Asosyasyones i Klubes para aedados i mansevos ande todos endjuntos fraternizan i komunikan sin esprito de rivalidad ni de superyoridad.
Despues de tres anyos de absensya a la sigida del desrepozo i de la muerte der mi marido, Myerkoles pasado el 17 del mez koryente, en el Barınyurt, tuve la okazyon de toparme de muevo en esta atmosfera de kerensya resiproka.
Mi emosyon fue grande, era komo un retorno en el pasado ...de ahuera la mizma guerta, la mizma fragua , aryento la mizma konvivensya, el mizmo arresivo kayente... un pranso aparejado kon kudyo i dezeo de azer plazer, una prezentasyon de los platos ke era una verdadera fyesta para los ojos komo para el paladar.
Sovre la shena el grande komedyano Ali Poyrazoğlu. Kon humor i en diferentes pasajes muncha fineza, el mos prezento kuatro de sus muevos kolegas, mansevikos de vente a venteisinko anyos, ke el formo kon su saver i su eksperyensa... El mos konto los prinsipyos difisiles de su karrera i tambyen el apoyo ke resivyo de Vakko i de İzak Alaton... El mos izo riir i en mizmo tyempo pensar ... I verso la fin, el mos avlo de Zeki Müren, de los ultimos dias del grande kantador... Fue un momento de profunda emosyon en la sala ande avia un silensyo absoluto salvo la boz envezes tremblando del artisto...
Todo era esmovyente este dia... i mas ke todo la sensasyon de amistad ke avia en la atmosfera, entre los pensyonaryos i los myembros, ansi ke entre los benevolentes (gönülü) eyos mizmos...karas de los primeros tyempos pilares de la kontinuidad i tambyen, adjuntadas a eyas, karas muevas sinyo de renovelamyento... todas alegres, dulses sin ostentasyon ni ahana (boş patırtı) todas kon una maraviyoza simplisita , la del lavoro voluntaryo asumido kon plazer.
Fachas umanas diferentes las unas de las otras, kualas aedadas kualas mansevas, ke (puede ser) no se konosian mizmo asta el dia ande se enkontraron en un mizmo esforso para dar un poko de alegria a sus entorno, unidas ansi en una mizma aspirasyon.
De otra parte, arrankados de la soledad ke era la suyas, en los ojos de los pensyonados, una ekspresyon de serenidad ke solo puede dar el plazer de ser entornados de personas ke los oyen i keren entenderlos.
Myerkoles, en el Barınyurt, despues de 3 anyos de absensya, entendi ke “lo ke yamamos Progreso” no es solo un fenomeno ke mos pusha kontinualmente adelantre, ma sovre todo la armonizasyon entre lo ke ya avia de antes i lo ke kontinualmente se adjunta...
No ay derrokamyento en la verdadera evolusyon, ma enrikisimyento... La perenidad de un sistema no repoza sovre la immovilidad ma sovre el movimyento, a la sola kondisyon de no ser un simple remplasamyento de las vyejas valoros por otras mas muevas, ma de saver konstruir sin nada destruir de lo ke es valivle...
