Partisipasyon de Doğan Gidon a la emisyon direkta de la “CNN Türk” noche de martes 4/11, despues del anunsyo del rezultado de la Eleksyon Amerikana
El dia de la eleksyon prezidensyal de los Estados Unidos, el Konsolato Amerikano tuvo la idea de invitar (en Ankara komo en Estambol) syertas asosyasyones siviles, gazeteros , estudyantes de Universidad i entre eyos elevos de algunos liseos.
En el grupo de los 15 elevos del Liseo Amerikano de Üsküdar ke tomo parte a esta aktividad debasho la direksyon del Sn. Whitman Shepard, se topava tambyen Doğan Gidon.
En Estambol esta aktividad tuvo lugar en el otel Sheraton de Maslak el kual estava atado por la sirkunstansya al posto de televizyon “CNN Türk”, kon posibilidad de realizar una emisyon direkta, durante la kuala Doğan Gidon fue invitado a avlar, en su kualidad de reprezentante de la fraksyon manseva...
Le demandaron su punto de vista sovre el rezultado de la eleksyon , pregunta a la kuala el respondyo ke la politika del futuro prezidente le parese ser mas umanista i ke se aspera de el una kontribusyon pozitiva en la evolusyon ekonomika. El tambyen konto ke este sujeto fue diskutido en la eskola, komo tambyen fue tratada la kestyon de la influensa ke Barack Obama tendra sovre las relasyones Turko-Amerikanas.
Felisitamos kalorozamente Doğan Gidon por sus repuestas tan pertinentes i mos apresuramos de partajar muestra kontentes kon muestros keridos lektores.
