Despues del artikolo miyo ( en el Şalom) de la otra semana, resivi unos, dos telefones de amigas i konosidas. Lo mas fue demandar por mi salud komo syempre. Entre las konversasyones, unas me disheron ke devo konsiderarme komo Estambolliya syendo ke nasi i me engrandesi aki. La verdad es keridos amigos, yo no lo esto azyendo del todo ansya !! esto. İ no esto del todo dezrepozada de ser Çorluliya, a la kontra... Bueno basta kon esta kestyon.
En pasadas no se komo, me rendi kuento de una grande mankura miya. Yo en munchas okazyones, me esto akodrando aver eskrito sovre syertos distriktos ande los djudios bivyeron en mayoriya (çoğunluk). Espesyalmente sentros komo Hasköy, Balat, Kuzguncuk ets.. (Galata lo esto deshando por un otro lado). Bueno, yo no konosi muy byen estos sentros. Fue solamente los anyos d’alkavo ke tuve el dezeo i una kuryozidad profesyonal! diremos, de vijitar i konoserlos un poko mas mijor. Bushki, okazyones de irme mas frekuente a Balat i Hasköy.
Ya esto realizando ke no es sufizyente para pretender de konoserlos komo konose un “yerli”, un nasido de estos lugares... Konoserlos komo konosko Galata i la Kula. Enfin, komo dishe, para kompensar esta mankura miya, mizmo si es un poko tadre!, esto mirando de dokumentarme en la mezura de mi posivilidad. Esto perkurando a konoser un poko estos distriktos. En este kuadro, este enverano aviya metido al program de dokumentasyon! El sentro de Kuzguncuk. Ansi, una freska demanyanada de Agosto pasimos kon motor (ke son kaji vaporikos), de Beshiktash a Üsküdar. De ayi, kon taksi arrivimos a Kuzguncuk, no es muy leshos.
Direktamente kijimor ir al Kal Beth Yaakov. Esta Sinagoga ke tyene komo data de konstruksyon el anyo 1878, es konosida tambyen komo el Kal de Abasho. Es el uniko lugar ke konosko, ke tuve la okazyon de vinir unas, dos vezes. Era un diya de djugevez, i aviya una seremoniya de Tefillim. Apersevyendo karas konosidas, mos entravimos de entrar porke no estavamos vestidos konforme a la sirkumstensya... Kon pantalones jeans i tee-shirtes...
Preferimos asentar en un kafiko antes de dar un torno en las kalejikas i el Charshi. Kuzguncuk es el kazal el mas fidel a su pasado, es kalmo. Se puede dezir ke esta rezistyendo a la era de “beton”. En este kazal del Bosfor las kazikas vyejas estan briyando komo una djoyadura rala. Si dishe vyejas, no kero ke ayga malentendido. No son eskayidas estas kazas, a la kontra son byen konservadas. Avli kon syertos esnafes. Asigun lo ke me kontaron, los anyos d’alkavo muncha djente fuyendo del sentro de muestra Metropol, estan preferando bivir aki. Lo ke akselero la restorasyon de estas kazas.
Mizmo si no ay una data prechiza, Kuzguncuk es el primer sentro en la kosta Asiatika ande se instalaron los djudios. Dokumentos del 17. Siglo lo sitan komo un “kazal djudio”... El lugar ande se aretaron los ekspulsados de 1492, en sus kamino verso la Tyerra Santa. Por alguna razon kedaron aki i desharon de sava de ser enterrados en Kuzguncuk. Aki bivyeron komunidades de varias relijyones. Lo puedemos konstatar de las Sinagogas (una chika, otra grande), de la Eglisya Ermeniya, lado kon lado kon la Meshkita, i las Eglisyas Gregas...La Alliance Israelite Universelle avyo aki eskola en 1868. Fue solamente en 1875 ke estas eskolas de A.I.U avyeron sus puertas en Balat, Hasköy, Galata i Ortaköy.
Kansados, mos asentimos un poko delantre la mar, kontentes del torno ke izimos. Me aprometi de vinir en la primera okazyon i kontinuar... Me espanto ke este plano lo va deshar para mas tadre...
