Ke tyenen de komun estos tres temas asta permeter de meterlos en un mizmo artikolo?
A primera vista nada , ma despues de un chiko momento de refleksyon, la repuesta es klara : “la suma de esperansa ke kada uno de entre eyos kontyene”.
Una koza es evidente, el mundo sivilizado, oriental komo oksidental ya empeso a salir de su estado letarjiko de indiferensya, lo ke es un grande paso echo verso la luz, malgrado el estado de marazmo afektivo ande el se topa ...chikos koryentes de ideas mas o menas similares paresen afirmarsen ... i de mezmo se ve, raramente es verdad, la koegzistensya de elementos kontraryos ke paresen akseptar esta situasyon, sin por esto pedrer de sus virulensya ..
Revineremos a muestros tres sujetos: Barack Husein Obama parese de mas a mas devenir el simbolo de una posibilidad de trokamyento pozitivo en el mundo, opinyon akseptada no solo en el partido demokratiko Amerikano ma tambyen en la kategoria kompakta de los ezitantes i mizmo (en chika kuantidad, se entyende byen) en el partido republikano el mizmo.
Verso la fin de la semana pasada , despues la publikasyon del ultimo numero del Şalom, meldi en la prensa estranjera kel diaryo alman Der Spiegel lo nombro “el Mesiah”; i tambyen la muy serya revista franseza “Le point” avla de la “revolusyon Obama”.
Segun un otro gazetero, no uvo nunka en los tyempos pasados, esta kuantidad de djornalistos ajenos ke sigyeron kualkyer kandidato amerikano de tanto serka, asta embrujarlo de elojyos i prezentarlo komo una kombinasyon de John Kenedy i Martin Luther King reunidos... lo ke realmente no es poko.
La vijita de Nicholas Sarkozy en Israel. Otro motivo de esperansa...
Al prinsipyo de la kreasyon del Estado Djudyo, la Fransyaera sentimentalmente muy atada al destino de Israel, ma gradualmente, debasho la presyon de los interesos ekonomikos de la epoka, eya se avia poko a poko aleshado..
Alora, grande amiga del klan Arabo (sin portanto nunka akseptar la mas chika amenaza formulada kontra Israel) eya avia empesado a manifestar una syerta parsyalidad en favor de los palestinyanos
Sarkozy ,el, parese kerer restableser la atmosfera de amistad de los primeros tyempos, todo en insistyendo sovre la nesesidad absoluta de la kreasyon de un Estado Palestinyano independente, lo ke enfortesera la seguridad de Israel.
Ansi, el Prezidente Fransez arrivo Alhad pasado, el 22 del mez koryente, en Israel por una vijita de tres dias. Sus primeras palavras afirmaron la amistad ke el resyente enverso el payis ke el konsidera komo el “Milagro del venten Siglo”...
El kotidyano byen konosido “Le Monde”eskrive ke poko tyempo antes, a la okazyon de un presedente enkuentro, Sarkozy avia dicho a Ehud Olmert ke “ el puevlo Israelyano puedra syempre kontar sovre
la Fransya
kada vez ke su supervivensya i su seguridad seran amenazadas”En realidad el primer objetivo Fransez es de asegurar la importansa del rolo de la Evropa i partikularmente de la Fransya, en la bushkida de una solusyon al problema del Oriente Medyo.Lunes, grande diskorso del Prezidente Sarkozy en la Keneset, dezeando entre otras kozas la fin de la konstruksyon de muevas kolonias en los territoryos Palestinyanos.La noche, a la okazyon del pranso ofresido en su onor por Shimon Peres, el pronunsyo estas mizmas palavras: “El venten siglo fue el siglo de la kreasyon de Israel, de la lucha para su supervivensya, el kombate de kada punto para su seguridad. Oy estamos en el 21em siglo, el deve ser el siglo de la Paz...de la Pazpara todos los moradores de la rejyon...”
Un punto muy importante es ke Nicholas Sarkozy es muy oyido i apresyado de la parte de los dirijentes Israelyanos por su aktitud de fermeza konsernando el programa nuklear del Iran.
La viktorya del ekipo Turko de futbal en Vyena Vyernes la noche, la Turkia entera bivyo oras de emosyon ardyente,vyejos ,mansevos, ninyos, los ke se entyenden de las teorias del footbal i los ke no se entyenden deltodo ( lo ke es mi kavzo) ...todos estavamos delantre del chiko ekran, el korason realmente batyendo a un ritmo rapido para sigir el mach Turkia- Kroasia.
Asta el ultimo punto fue el suspenso ...verso la fin, un momento de desepsyon, ma kaji immedyatamente despues ”la immensa alegria”.
Rezultado ekstraordinaryo para la Turkia..la demanyana sigyente, en los ojos de todos "la esperansa de una mueva viktorya myerkoles la tadre" .Si... lo ke ay de komun entre estos tres eventos es la esperansa, la suma de lo ke eyos reprezentan : “El ekilibro de un mundo mas djusto” , “ la Pazi la seguridad en el Oriente Medyo”, i "el dezeo de un poko de apresyasyon de la parte de los otros"
