Tres bodas en la Sinagoga NeveŞalom
Alhad el 22/6, la Luz, la Alegriai la Kerensyaestavan kumbidadas a tres bodas. Komo syempre, la grande Keila estava yena de flores i de rizas, las karas de los paryentes i amigos resplandesyentes de kontentes ...en los korasones la mizma emosyon i sovre los mushos las mizmas bendisyones. Ansi se selebro para una larga vida de felisidad i amor, la unyon de: Sibel Almonel kon Beni Kohen, Yael Yahya kon Nedim Bali, ijo de Beti i RIfat N. Bali, byen konosido historyano de muestro payiz i muestra komunidad. Rozi Varol kon Moris Levi. El Bendlcho Sea Su Nombre los bendiga i aga syempre reynar en sus korasones "la kontentes", "la armonia" i "la fervor"..
El karikaturisto İzel Rozental en una emisyon de la Televizyon Franseza
K.P.
Komo de uzo, alhad la tadre, la televizyon Franseza TV5 mos dyo la emisyon KİOSQUE ke rekoje kada semana kuatro diferentes gazeteros ajenos para diskutir de los problemas i eventos semanales.
Esta vez el grupo era kompuesto de kuatro karikaturistos de retorno de Israel ande (en toda libertad, sin niguna restriksyon) tuvo lugar un kongreso al kual partisiparon artistos de payizes diferentes, amigos komo adversaryos del Estado Djudyo.
Estos kuatro artistos fueron eskojidos entre los mas apresyados, por la kualidad de sus arte i de los temas ke eyos desveloparon sin agresividad partikular, bazados sovre la denunsyasyon de la injustisya i de aktos de intoleransya, i la bushkida de la verdad.
Entre los kuatro partisipantes Plantu el famozo karikaturisto del kotidyano “Le Monde”, Ali Dilem de la prensa Aljeryana, Michel Kishka grande karikaturisto Israelyano i İzel Rozental del ebdomadaryo Şalom.
Devo konfesar ke muestra alegria fue muy muy grande.
Un adolesente djudyo gravemente ferido en un kartyer de Paris
Shabat la tadre, un manseviko djudyo de 17 anyos ke yevava una kipa sovre la kavesa, fue gravemente ferido en un kuartyer de Paris, por sinko adolesentes de una komunidad diferente ke lo harvaron asta desharlo kaji muerto en basho.
El fue immedyatamente ospitalizado , ma malgrado una chika mejoria en su estado jeneral, sus dias estan ainda en perikolo
Es ke se trata de un enfrentamyento entre dos komunidades? O byen de muevas olas de antisemitizmo?
P.S.: Las ultimas novedades mos ambezan ke el mansevo ya salyo del koma.
