La muerte de dos djustos
Es kon tristeza keAlhad, el 8 del mez koryente, asistimos a dos funerales de paryentes direktos de amigos ke apresyamos partikularmente..
La demanyana, en el simeteryo de Hasköy muevamente restorado:
Nesim Levi
padre de Selim i Elyo Levi i eshuegro de muestra direktora de edisyon Tilda Levi.
El serro su ojos por syempre, entornado de la kerensya de sus ijos i del respekto i konsiderasyon de todos los ke lo konosyeron de serka, los kualos mos dizen ke era un ombre derecho i sezudo, syempre de buen konsejo, fiel a sus prinsipyos de onestedad i solidaridad..
Despues de medyo dia, en el el Bedahayim de Ulus: Sultana (Tania) Bahar
Mujer de karakter muy novle, kultivada, grande lektora de literatura franseza, madre del Snr. Rifat Bahar i del Profesor Dr. Moise Bahar muy byen konosido en muestra komunidad komo tambyen al nivel nasyonal de muestro payis, por su grande sensya, su probidad i su esprito de solidaridad.
Dos personas de valor ke bivyeron asta la fin de sus dias en la dinyidad i la estima de todos los ke los konosyeron. Ke Eyos repozen en Ganeden.
Muestras sinseras kondolensas i la ekspresyon de muestra profunda simpatia a las famiyas Levi i Bahar.
