Trajikos bilansos de las katastrofas naturales en Kina i Birmania
50.000 muertos en el seizmo de Kina, sivdades enteras, moradas i eskolas derrokadas, syenes i syenes de elevos debasho de tyerra , viktimas de fraguas frajiles, neglijensyas i abuzos ekonomikos.
Por la mas parte estos ninyos eran ijas o ijos unikos de sus paryentes a la sigida de la ley Kineza ke prohibe mas de una kriatura por famiya... el drama es atros... inkomensuravle.
En Birmania el bilanso de las viktimas del siklon ke destruyo una grande parte del payis, es de mas de 77000 muertos a los kualos kale adjuntar kaji 56000 personas desparesidas, lo ke aze, en total, mas de 130.000 personas...
130000 personas laskualas 10 puntos antes de la desgrasya, estavan ainda bivas, kada una kon sus problemas o esperansas , kada una kon su dezeos realizavles o no...sus proyektos, sus programa de los dias a venir.
Las radyos i televizyones de los payizes vezinos ya avian anunsyado la violensa de esta tempesta devastatrisa, ma enfokada en sus sola otoridad, “la Junta” no izo nada para avertir la populasyon i evitar ansi la muerte de miles de kriansas umanas.
La trajedia fue terrivle i es ainda terrivle, inkomparavle porke a este drama kavzado por las fuersas syegas de la natura se mesklaron tambyen los efektos perversos de un rejimen de governansa diktatorial ke aksepta de sakrifikar sus propyos sitizanos afin de sovreguadrar el prestijyo de su otoridad.
Komo lo aviamos eskrito la semana pasada en esta mizma pajina, la Junte Birmana esta syempre kontinuando a blokar el ayudo internasyonal. Kamyones yenos de komanya i de medikeria ansi ke medikos i personal sanitaryo espesyalizados en semejantes kavzos estan ainda en la frontyera, asperando la otorizasyon de entrar para akudir los reskapados.
Los riskos de muevas muertes son iminentes ...” feridas infektadas mal kuradas”, “epidemias ke seran en poko tyempo invinsivles”... i ainda, inkonsyentes de la enorme kulpabilidad ke eyas estan asumyuendo, las otoridades Birmanas refuzan el ayudo internasyonal.
El puevlo abatido por la krueldad de las fuersas naturales, no tyene por seguro el koraje de revoltarse kontra la diktatura asasina de sus dirijentes i aboka la kavesa delantre un destino echo de inegualidades i injustisyas.
Ma, deke es ke la “Onu” tadro tanto a intervenir? Ay solo dos o tres dias kel emisaryo de esta grande Organizasyon arrivo en el payis en ruina.
Deke esta lentor kuando un puevlo se topa en peligro de muertre?
En el kavzo en kestyon no se trata solo de un derecho de injerensya, ma de un dever de asistensya a personas amenazadas por la ambrera i la muerte.
K. P.
