Estamos bivyendo los ultimos diyas de la Primavera. Afuera ay un tyempo maraviyozo, el sol briyando en un sielo klaro. Tengo la impresyon ke oganyo la mueva sezon ampeso mas temprano. Fin de Marso afilu aviya arrekayntado... Para mi los sinyos konkretos de la Primavera son los arvoles delantre muestra ventana, ke ampesan a vestirse de sus parur i de abondansa de ojas vedres komo un mirakolo...
Es ke semos konsyentes de la shans ke tenemos de bivir en una de las mas enteresantes sivdades del mundo?... D’akordo, no es mas la de antes, el Estambol de muestra manseves. De una manera se afeyo, se izo un monton de beton. Ma, oy no kero tokar a este aspekto del sujeto. No tengo entisyon de entrar en kritikas i amenguar el plazer de estos diyas de Primavera, en kualos redeskuvri una chika partida de las “perlas” de la sivdad... Byen entendido, esto avlando de ermozuras natural...
La semana pasada eskrivi sovre el paseo muestro en “Parkorman”. Despues ya fue aparejos de Pesah. Komo dar un entervalo a la mueva sezon, i el tyempo ezyelo, tuvimos diyas enuvlados, de vez en kuando luvyozos. Portanto el mez de Mayo kon su esplendor no eskapo. Ma, no vos do dinguna garansiya de tyempo klaro kuando meldarash estas linyas!!...
La “Arvoleriya de Emirgan” (Emirgan Korusu) es uno de los lugares ke se deve vijitar en esta sezon. Una fyesta de flores de kolores a kolores... Un pedaso de la kuvyerta de vedruras del Bosfor... Las palazas (ördek) nadando en el lako miniskul (gölet)... Las tulipas (lale) de diversas kolores i las manolyas ampesando a enfloreser en los arvoles... Esto todo ke da un plazer imenso a la persona... No es solo para kontemplar la Primavera, ma bivirla yena, yena antes las kalores... Aviya anyos ke no viniya a este paradizo. Mos asentimos en “Sarı Köşk”, enteresante edifisyo de tavla, en el stil de “Chalet”. Tomando un kafe, entre una armoniya de flores pudimos admirar un inkomparavle panorama del Bosfor.
Pasando unos, dos diyas, una demanyana pensimos de vijitar el “Yıldız Parkı”, relativamente serka de ande bivimos. Despues de un chiko torno en los kaminikos entornados de arvoles, desidimos de asentarmos en la terasa de “Malta Köşkü”, en la dulse freskor de una demanyanada de Mayo. Al pareser uvo muevamente restorasyones en la fragua i en el derredor, porke remarki trokamyentos. Bueno ke ya aviyamos dezayunado en kaza, si no en akel aver, enfrente de la vista i el “djimbush” de kolores mos ivamos olvidar rejim i dieta!!.. Este Parko, ande se fraguo kon tyempo los Köşkes “Malta i Çadır”, de la parte de los Sultanes era konsiderado komo la “guerta de detras” (komo se dize en turko:arka bahçe) del Palasyo Çırağan del bodre de mar.
No se komo va estar el tyempo kuando el lektor va meldar este teksto. Sielo eskuro? Fresko o azyendo luvya?... Ke importa!... Ansi ke ansi Junio esta detras la puerta, kon la alegriya de Shavuot otrun poko. Antes de meter el punto d’alkavo, tengo una remarka. Azyendo el kontrol final de este artikolo, me rendi kuento ke empleyi una muchidumbre de adjektivos (sıfat). La verdad ke me enkanti, no es mi manya de azer este karar de alavasyones!!.. Deve ser de la borraches de la Primavera!....
