Estranya epoka ke la muestra

Klara PERAHYA Judeo-Espanyol
14 Mayıs 2008 Çarşamba

Estranya epoka ke la muestra...un pensador Fransez (si no me yerro André Malreaux) avia dicho kel 21em siglo iva ser el siglo de la relijyozidad... puede ser. Portanto, no se deke, de syempre tuve la impresyon ke no es solo el siglo de la relijyozidad ma prinsipalmente “el siglo del ekseso en todos los kampos”, i por seguro tambyen en la relijyozidad, en la observansya absoluta de los vyejos preseptos i el respekto eksesivo enversos los vyejos tekstos, sin tomar en konsiderasyon la evolusyon istorika teknika i psikolojika de la umanidad.

De otra parte, el es igualmente para el ombre, el siglo del ekseso de su menester de gozar de kada koza, de bivir presto, de gostar a todos los plazeres  i ir asta la ultima limita de sus dezeos, komo si “kontentarlos en sus totalidad” sera ayegar a la felisidad.

Estranyo mundo, kon su parte de luminozidad, su arte florisante ke puedemos entender o no, libre de la dominasyon severa de los vyejos prinsipyos de la estetika...estranyo mundo kon su progreso syentifiko ke no se puede nyegar, ma munchas vezes tambyen jenerador de desgrasyas.

La mizma dualidad en kada koza, la mizma kuantidad de luz i oskuridad, de provecho i  danyo, lo ke mos ensenya ke nada puede ser enteramente inosente ni enteramente kulpavle...

Egzempyo muy komun: "estos telefones portables" grande pasyon de la manseves...En las kayes, a lo manko un joven sovre tres kamina el aparato apegado a la oreja, riendo i charleando kon un interlokutor invizible, inkonsyente del terrivle perikolo de tumor serebral ke esto komporta.

Egzempo tambyen: En la Evropa del venteiunyem siglo, en el payis promulgador de la deklarasyon de los derechos del ombre, el triste komporto del sinyor Jean Marie Le Pen, syempre fidel a el mizmo, el kual afirma de muevo la kaji negasyon de los kampos de la muerte nazis, tratandolos de simple detalylo.

Aunke, ay de esto 20 anyos, el fue djuzgado i kondenado por el mizmo motivo, el parese no kerer aseventarse...

Deke este odyo tenas? deke esta obstinasyon syega a nyegar lo ke numerozos testigos okularyos afirmaron i ainda afirman kon fuersa? deke desmentir lo ke la grande mayoridad de los desendyentes de los responsavles, rekonosen i se esforsan de reparar?

Ay de mezmo tantas otras kozas, tantos prejuisyos, tantas injustisyas a denunsyar i kontra los kualos devemos luchar...Ke azemos reelmente, kada uno segun su poder?

Si, yoramos unos kuantos puntos, ekspresamos muestra revolta, mos lamentamos sovre las inegualidades del suerte... Sin dubyo, diskorsos grandiozos son pronunsyados... Ma kual es el rezultado?

En la Birmania ande miles i miles de personas pedrieron la vida a la sigida de una terrivle tempesta, munchas otras ke pudyeron sovrebivir a la terrivle katastrofa atmosferika, son kondenadas a murir de ambre i de paludizmo aunke kamyones de komanya, medikerias, medikos i asistyentes sosyales estan asperando a la frontyera el permeso de entrar.

Ke fue realizado en el Darfour i en varios otros payizes despedasados por konfliktos etnikos i kaji syempre en perikolo de ambrera?

Deke algunos nasen en payizes prosperos i relativamente sivilizados? i otros sovre tyerras eskasas sin agua para pueder arar i sembrar? Deke para unos la vida i para otros la muerte?

Es ke el ombre tyene la mas chika posibilidad de enderechar kualo ke sea?

P.S. La televizyon vyene de anunsyar el terivle terremoto de Kina. El Dyo ke se apiade del mundo i de la umanidad.