El premyo “Yunus Nadi 2008” fue partajado entre
Şevket Çizmeli por su livro “Menderes Demokrasi Yıldızı” i
Rıfat N. Bali por su investigasyon historika sovre “Sami Günzberg”
K.P.
El importante premyo “Yunus Nadi 2008“ fue parsyalmente atribuido al byen konosido historyano Rifat N. Bali por su livro titulado:
“Sarayın ve Cumhuriyetin Dişçi Başısı Sami Günzberg”
ovra ke mete simultaneamente en relieve las relasyones ke egzistian en el periodo Otomano i egzisten en la epoka republikana entre las Otoridades Turkas i la komunidad Judia.
Komo ya lo aviamos dicho en esta mizma pajina, poko despues la publikasyon de este livro, el es partikularmente interesante, eskrito en un estilo muy klaro, i lo ke es muy importante, de una verasidad historika absoluta, bazado ekskluzivamente sovre dokumentos otentikos.
“2008 Yunus Nadi Ödülü” es el segundo premyo ke Rifat Bali obtuvo en el espasyo de unas kuantas semanas i esto es una atestasyon irrefutavle de la valor de su lavoro.
Muestras sinseras felisitasyones al historyano i muestro dezeo de muevas ovras syempre valerozas i apresyadas.
