Oy tengo ke eskrivir...

Coya DELEVİ Judeo-Espanyol
27 Mart 2008 Perşembe

Personajes de muestra Komunidad, o amigos de Elie Perahya eskrivyeron, o a lo menos, kon dos, tres paragrafos evokaron rekuerdos... Otros se kesharon de no topar los byervos para deskrivir  su valor... Ma, yo lo ke pude eskrivir fue unos dos byervos de omenaje en el “Şalom” del 5 Marso. No era indiferensya de mi parte. Kualo pudiya dezir, ke no se disho por este amigo tan valorozo?...

Naturalmente, ay anyos ke konosi su nombre. Es mas ke un nombre, es una “nombradiya” seya de Elie, seya de Klara. Esto konfesando, no tuvimos kontaktos estrechos asta antes 6-7 anyos, aun ke era mi grande dezeo. Un diya, los enkontri en la kaye, vensyendo mi timididad me aserki i me prezenti. Aklarare un punto: tengo en los Estados Unidos, primikos ke son amigos de Elsa i Vitali Franko, ija i yerno de los Perahya...

No paso muncho, empesi a eskrivir al “Şalom”. Klara i Elie me enkorajaron.Tuve okazyones de asistir kon eyos a reunyones, o toparme en sus kaza. En este kuadro no me  olvido la komida de noche Shabbat ke tuvimos en “Barınyurt”, el Septembre 2005. Era  organizada en onor del grupo de

la Universidad Ben

Gurion, Sentro Moshe David Gaon de Kultura Judia-Espanyola. Los elevos syendo enkavesados por profesores i ensenyantes, tuve la oportunidad de konoser

la Prof. Tamar

Alexander i el Dr. Eliezer Papo. Los solos ajenos afuera del grupo, eramos el kupl Perahya, yo i mi marido i naturalmente la kerida Karen. Tuve entonses, okazyon de avlar kon Elie i demandarle syertas preguntas. Reelmente un rekuerdo memoravle...

En el presipyo del 2006 ize para la revista DYD (Dostluk Yurdu) un “interview” kon Klara. A una de mis demandas me respondyo: “No me plaze avlar de mi. Lo ke puedo dezir es tengo una famiya i ijos ke adoro. Son “todo” para mi. Mi marido me ayuda dandome apoyo i ideas en mi lavoro. Entre mozotros egziste una grande kompreansyon i amistad. Mizmo si no semos syempre d’akordo, las diskusyones ke azemos mos enrikese.”

Savyendo byen las konosensyas del kupl i sus eksperyensas, le demandi a Klara si no pensavan arrekojerlas en un livro. “Arrekojer muestros rekuerdos?!!.. Orozamente ke ay en muestra Komunidad istoryanos, eskrivanos mas kompetentes ke lo pueden azer mijor ke mozotros...” Esta repuesta de Klara era komo un sinyo de la modestiya del kupl Perahya...

En todo kavzo tengo un chiko afalago. A lo menos una seksyon de la vida, de las eksperyensas de Elie va kedar para

la Eternidad

en arshivas, syendo ke fue un “informante” del Proyekto “Centropa”. Myentres estas  entrevistas, el tyene dicho: “Ay dos diyas, ayer i amanyana ke no son enteresantes para mi. A mi me enteresa “OY”, el momento ke esto bivyendo. Lo ke paso ya paso. Amanyana ke va ser? No savemos.”

Es kuryozo komo estos byervos estan en la paralela de mis ideas ekspozadas en un teksto miyo (Fatalidad En Versos “Şalom”-7 Julyo 2004). Era un kurto artikolo empesando kon un proverbo judio: “No te preokupes de amanyana porke no saves afilu kualo te puede akonteser oy”..., i segido de una larga poezia miya. Aki unas kuantas linyas:

 

Ayer ya eskapo, ya se izo pasado,

Amanyana venir, puede no...

Lo ke solo tyenes en tu mano,

Es el momento k’estas bivyendo.

Bive la vida d’akel momento,

Seya invyerno o enverano,

Bive la vida yena, yena,

Una vida sana, vida buena...

                           C.D

 

Muestro amigo Elie bivyo en fakto una vida byen yena de arte, muzika, literatua i erudisyon. En paz ke repoze su alma. AMEN.