I lo irrealizavle puede devenir realidad

Klara PERAHYA Judeo-Espanyol
27 Mart 2008 Perşembe

Todo es realizavle en la larga istorya de un puevlo. Ken puedia imajinar ke manko de 70 anyos despues la terrivle trajedia de la Shoah , la lingua Almana (konsiderada komo maldicha de la parte de munchos de muestros korelijyonaryos) sera oida al seno mizmo de la Keneseth de Israel, ke konstitue el simbolo mizmo de la  libertad absoluta del  puevlo Judyo.

Unos kuantos deputados  Israelyanos refuzaron de asistir a la Seduta

parlamentarya en kestyon, en el buto justamente de protestar kontra la utilizasyon de este idioma en un payis ande  el rekuerdo de 6 milyones de Judyos matados por los nazis sera syempre bivo.

Por seguro, los kampos de la muerte kedaran syempre en la konsensya judia komo una yaga ke nada, ni el tyempo, ni las muevas sirkunstansyas, ni mizmo las muevas amistades puedran azer despareser.

Ay, es verdad, valores ke son permanentes  i rekuerdos  ke no puedran nunka ser efasados, ma kale tambyen admeter ke no se puede bivir ahuera del tyempo ...Sin tokar a los prinsipyos de baza,  kada mueva epoka  tyene  sus propyos parametros, sus propyas egzijensyas  munchas vezes imperyozas,  sus propyos protagonistos, diferentes de los presedentes.

Devemos en mizmo tyempo akseptar ke  ninguna responsabilidad direkta repoza sovre la espalda de los ombres i mujeres de la jenerasyon almana  de despues la segunda gerra mundyal... “ni los padres pagaran por los ijos, ni los ijos por los padres..ninguno asumira la karga de un krimen ke el no kometyo” mos dize la Biblia.

La aktual kanchelara Almana  apartyene a esta jenerasyon... Martes el 18 Marso 2008, en el Parlamento Israelyano, eya avlo, al empesijo en Ebreo i despues en Alman. Eya empeso kon estas palavras simbolikas, dichas en Ebreo: vos rengrasyo de averme permetido de avlar en mi lingua maternal  en el seno de esta  grande  Institusyon”

Angela Merkel se atako direktamente a la  inyovle epoka  ke eskuresyo

la Istorya

de su payis: “

La Shoah

mos inche de verguensa, mozotros los Almanes... Me enkorvo delantre las viktimas, me enkorvo delantre los sovrebivyentes i todos los ke los ayudaron a  sovrebivir... Los Almanes i los Israelyanos seran syempre atados de una manera partikolar por la memorya mizma de este terrivle akontesimyento. Mas tadre, en  repuesta al Primer Ministro Israelyano ke evoko la pozisyon enerjika de

la Kanchelera Almana

sovre el dosye Iranyano i su intervensyon segun la kuala “... todo modo de asalto a la seguridad de Israel tendra la mizma  gravidad ke un asalto a

la  Almanya

”, eya respondyo “Las amenazas ke azen sentir los Iranyanos kontra Israel i el puevlo Judyo son , no ay dubyo, una kavza de grande inkyetud para mozotros”.

Konsernando el konflikto Israelo / Palestinyano, la Kanchelera evoko los golpes de roketas de los grupos armados de Gaza kontra el Sud de Israel i insistyo ke estos asaltos deven absolutamente  kedar... I antes de prezentar a la asistensya sus dezeos i suetos por el 60en  aniversaryo del Estado de Israel, eya repeto: “

La Almanya no va nunka abandonar Israel,  eya kedara syempre su partenaryo i real amigo”.

Ay un tyempo para  el odyo i un tyempo para la perdonansya... un tyempo ande las feridas  (sin pedrer  sus trasas) devyenen si no manko dolorozas  ma a lo menos manko virulentes...

En desparte de su valor  de solidaridad i apoyo  al puevlo Israelyano, este  diskorso tyene oy en dia una valor de voluntad de reparasyon. I tambyen konstituera syempre, en el futuro (kuando no kedara mas ningun testigo okular para  atestar lo ke se paso en la epoka nazi), una prova irrefutavle  de  la realidad de la  Shoa, lo  ke sera de una grande utilidad a la lucha kontra el negasyonizmo.