Israel Invitado de Onor del Salon del Livro de Paris
Un onor muy apresyavle fue echo a la literatura i al prezidente de Israel “Shimon Peres” ombre de paz ke lucho syempre afin de ayegar a un tereno de entendimyento mutual kon el puevlo vezino.
Los mas grandes eskritores Israelyanos (entre los kualos numerozos ovreros i luchadores por la Paz entre Israel i la Palestina ansi ke por la kreasyon de un Estado Palestinyano, komo Amos Oz i David Grossman) partisiparon a este ermozo akontesimyento. El eskopo era de meter endjuntos, en un espasyo sin odyo ni prejuisyo, konsakrado a la refleksyon i a la libre diskusyon, lo mas posivle de pensadores de diferentes opinyones.
El bibliofilo Suiso byen konosido “Martin Bodmer” tyene dicho: (tekstualmente en fransez): ”La littérature universelle, c’est l’humanité en chemin vers elle-meme” (la literatura Universal es: la umanidad dirijendose verso si mizmo)
Malorozamente los eskritores Palestinyanos, Marokanos, Tunizyanos, Aljeryanos ansi ke de diversos otros Estados Arabos, refuzaron esta okazyon de un muevo enkontro dedikado al pensamyento i a la bushkida de la verdad en una esfera libre de todo modo de elementos politisyanos, i boykotaron esta ermoza Konferensya.
Purim en la Sinagoga Ahrida de Balat
Komo ya devino una tradisyon, Purim fue fyestado kon fidelidad i alegria en la Sinagoga Ahrida de Balat, antiguo vestijyo de una epoka pasada, en prezensya del Gran Rabino Isak Haleva i su konsorte, la Sinyora Rejin Haleva, del prezidente de muestra komunidad Silvyo Ovadya, del Prezidente onoraryo Bension Pinto, de los Vice-Presidentes Sami Herman i Robert Abudara, de Rav Moshe Benveniste myembre del Bet-Din i su konsorte Fortüne Benveniste, de prezidentes de diversas Komunidades, İnstitusyones i Ovras de byenfezensya, ansi ke de numerozos myembros del Konsilyo del Hahambaşılık i yahidim...
La prezentasyon de la seremonia fue asumida por Erol Malki.
En su avla de “byen venida i avyertura”, Albert Süryano, prezidente de la Sinagoga Ahrida, ekspreso la kontentes ke le prokura la komemorasyon de una semejante fyesta i agradesyo kon fuersa los dirijentes del Talmud Tora, los paryentes ke apoyan este ermozo lavoro, el responsavle del sistema muzikal Murat Eskenasi, ansi kel grupo de Maftirim.
Rav Benveniste avlo de la nesesidad de ayudar los menesterozos i de embiar komanya a paryentes i amigos, lo ke konstitue los uzos i kostumbres de esta fyesta. El prezidente de la Komunidad Silvyo Ovadya insistyo sovre la importansa de azer bivir lugares istorikos, tal los kales Ahrida i Yombol, i disho kel departamente “Hahambaşılık halkla ilişkiler” esta aparejando un plano de lavoro a este sujeto .El tambyen avlo de la importansa del Ospital Or-Ahayim i de la Eskola “Özel Musevi Lisesi. Los ninyos del Talmud Tora izyeron kon grande sukseso una reprezentasyon teatral de la fyesta de Purim ,,,
I, en su diskorso, el Gran Rabino Rav Haleva disho:” kuanda bivimos un milagro, no mos rendemos immedyatamente kuento de la koza, es solo kuando echamos una mirada al relato istoriko ke realizamos la koza”
La seremonia tomo fin kon la avyertura del Ehal i la orasyon de Anoten. Debaho la direksyon del shefe Menahem Eskenazi, el Koro de los Maftirin kompuesto de Robert Elmas, Albert Güzelbahar, Sabi İyigör, Selim İyigör, beni Albukrek, Yusuf kapsi, Sedat Amon, Mordo Razon, jak Pardo i Bensi Elmas izyeron oir las ovras “Yishlah Mishamayim”, “Ahare Nimkar”, “Empesar kero kontar” i “azkir Hasde.
Los ninyos del Talmud Tora alegraron la seremonia kon sus kantes, i a la salida el Komite del Kal Ahrida ofresyo “mavlachas” i “regalos” a la asistensya.
