Un ombre ke bivyo kaji un siglo.
Un ombre ke se aprovecho de kada segondo ke bivyo i valorizo su vida komo eksperiensas asta ke sirkulo su eksperiensas en su venas i en su mentes.
Un ombre ke en kada problema se aserko komo un solusionador i no komo un problemador.
Un ombre ke siempre se sintyo responsable verso su ermanos en partikulidad, i verso toda la umanidad en djeneral.
Un ombre rasionalisto en su pensamientos i komportamientos, sin neglidjar ni un segondo la valor imensa de la spiritualidad.
Un Ombre ke muy bien konosiya la filozofia de Martin Buber i Emanuel Levinas tomandolos komo los guias para su modo de bivir.
Un ombre erudito en todo modo de senso.
Un ombre ekelibrozo en su relasiones.
Un ombre sansible a todo modo de evenemento, sentimental i reaksionario kontra la endjutisia i la irregularidad.
Un ombre ke ekelibro en su echas i en toda su vida el modernizmo kontanporaneo i el konservatizmo tradisional.
Un Ombre ke munchos de nozotros nos pudiamos servirmos de el komo un ejemplo.
Un ombre ke pudo ser el orgulyo de su famiya i ke alkanso a mereser de glorifikarse kon su famiya.
Un ombre ke muy pokos en el mundo komo el, ke meresyo a yevar su nombre adekuado a su personalidad.
Un ombre ke se yama Eli Perahya. Flor de Dios.
Nos despedimos de el en estos ultimos diyas todo en akompaniandolo kon las flores ne nuestros korasones.
Repoze su alma en verdjeles del Gan Eden ke ya lo meresyo en vida.
Zeher Tsadik Livraha. Su rekordo pase por bendisiones.
Rav İsak HALEVA
Gran Rabino
