La ventana de vuestra ermana / El Dia de las Mujeres

Şeli GAON Judeo-Espanyol
27 Şubat 2008 Çarşamba

El 8 marso se fyesta komo el dia de las mujeres, en todo el mundo. Este dia es el aniversaryo del esforso de las mujeres, para tener los mizmos derechos kon los ombres. Este dia se ampeso a fyestar en el anyo 1977.

Es un dia de solidaridad entre las mujeres del mundo entero.

La unyon de las Nasyones Unidas (Birleşmiş Milletler) aksepto; ke dar los derechos iguales a las mujeres, va arezyar (güçlendirmek) la pas en el mundo.

Ay mujeres poderozas ke rezolvan todos los echos de si para si. Eyas lavoran para ganar paras i estar enriva de sus pyezes , para pueder opozarsen a las difikultades de la vida.

Eyas se entyenden de todas las reparasyones (tamirat), i de las modifikasyones (tadilat) en sus kazas i este modo pueden kontinuar sus vidas personal, sin tener menester de un ombre.

Eyas pagan sus fakturas, koryen a todo modo de akontesimyento, tyenen la amor de la libertad.

Las mujeres ke tyenen una intelijensya briyante, un koraje i ke son avyertas a la varyasyon (değişim) i persiguen (takip etmek) los desvelopamyentos , pueden kreyar una tentativa reushida (başarılı girişimler).

Es verdad ke en la Turkiya tenemos munchas mujeres mansevas ke estan divorsadas u bivdas, biven solas, eyas tyenen un nivel entelektual ma; para pueder bivir lavoran i rezisten a las difikultades.

Ya paso 31 anyo de la akseptansa de este dia.

Kualo troko ?

Yo penso ke; la mujer no tomo el lugar ke kere i ke merese en el punto de vista de la vida komersyal, en la politika no se esta puedyendo reprezantar komo kere.

Para pueder reushir en el lavoro, en la vida de la profesyon; las mujeres tyenen kalitades espesyales.

Eyas se amostran komo son, tyenen konfiensa a si, no se espantan de azer yerros, kadal dia se ambezan una koza mueva, kontrolan syempre sus konkorentes (rakipler) en el dorredor ande estan lavorando, para pueder arivar a la perfeksyon.

Malgrado esto; en la Turkiya se izo una envestigasyon (araştırma) i se topo munchas repuestas enteresantes komo;

- 20 % de las mujeres no saven meldar i eskrivir en el dor ke bivimos,

- De 100 mujeres ke estan estudyando solo 2 de eyas estan terminando la universita,

- 2500 mujeres estan peryendo la vida en keryendo azersen madres.

Para pueder reushir en la vida del lavoro; eyas son korajozas, tyenen una veluntad (azim) fuerte.

 En el mundo entero ay munchas mujeres, ministras emportantes, senatoras; eyas provaron (kanıtlamak) kon sus independensyas; la reushitad en todo modo de punta de vista.

Komo por egzempyo; Golda Meir (zihrono livraha), ke fue la ministra prinsipala de İsrael, i reusho en su karyera. Simone Weil ke fue la presidente de l’ONU, Hillary Clinton; senatora de New York.

Eyas son apuntadas i konosidas por todos.

 No se fuyen de tomar responsabilitades.

Eyas son madres de sus ijos, mujeres de sus maridos i ijas de sus madres i padres.

Ande esta la mujer; ay la entuisyon (sağduyu), la fineza, la veluntad (irade), i la reushitad ke vyene kon la pasensya.  Las mujeres son muy capaches enriva del dezeo. Eyas si se meten una koza a la kavesa, se van fin a la fin i azen lo ke dezean en arivando a sus butos.

No egziste sivilizasyon sin mujer.

La mujer es kapache, tyene kerensya, afeksyon, tolerensya, domina toda su famiya para tomarlos debasho de sus alas, para protejarlos kon sus sentimyentos de madre. Eyas son las patronas de sus kazas fina al maz chikos detalyos.

Todo se demanda de las madres.

 Eyas tyenen un lugar emportante; en la famiya, en la komunitad i en todos los terrenos.

Biveremos syempre kon pas i amor, todos endjuntos.