“Sami Kohen Dünyanın Yazısı” de Özer Yelçe

Klara PERAHYA Judeo-Espanyol
23 Ocak 2008 Çarşamba

No se si lo ke vo dezir korresponde absolutamente a la realidad, segun mi modesta opinyon ay dos elementos de baza en el grande djornalizmo.

El uno: la transmisyon immedyata, ma syempre bazada sovre elementos otentikos, de evenementos ke se produzen en tal o tal lugar del mundo, lo ke inkontestavlemente nesesita un interes insesante por todo lo ke se pasa en muestro entorno serkano komo leshano, un grande koraje fiziko, i sovre todo un esprito de observasyon kontinual i de deduksyon fulgurante.

El otro: endjunto kon la transmisyon de la novedad, un empesijo de analiz del kavzo i gradualmente (lo ke es posivle en la prensa kotidyana) el estudyo progresivo del evenemento ansi ke de todo lo ke pudo provokarlo i tambyen de lo ke puedran ser sus konsekuensas.

Sami Kohen apartyene sin dubyo a esta kategoria. En sus repuestas a Tilda Levi direktrisa de edisyon de muestra Gazeta, lakuala tuvo kon el una larga i muy interesante entrevista ( Şalom del 9/1/2008 ), el afirmo su prinsipyo de nunka sakrifikar la otentisidad, mizmo al risko de pedrer el avantaje de tener la primasia de una novedad.

El livro del gazetero Özer Yelçe kolavorador serkano de Sami Kohen i su suksesor en el posto de shefe del Departamento de los Echos Eksteryores de la Gazeta Milliyet, es komo un largo dialogo entre el otor i los artikolos de S. Kohen, un omenaje implisito enverso muestro amigo.

Una fuerte estima mutual aunan sin dubyo los dos gazeteros, los kualos kon la agudeza de sus fakultad de persepsyon i la objektividad de sus deduksyones mos dyeron una ovra de profundo pensamyento.

Este livro ande se suksedan los grandes akontesimyentos mundyales (Evenementos de Kibris, Golpe de estado en Gresya, Gera Yelada entre el Oksidente liberal i la Unyon Sovietikla, Eventos de Praga, Mao i despues de Mao en Kina ets...ets...) es antes de todo un livro de refleksyon, una retrospektiva muy interesante ke espande delantre los ojos del lektor el lavoro de investigasyon i de analiz ke fue echo en su tyempo,en la atmosfera mizma ande se produzyeron los akontesimyentos.

Una retrospektiva tyene el doble merito de dar a la posteridad una idea kaji kompleta del volum de lavoro kumplido i tambyen a la luz del estudyo echo sovre algunos faktos i sovre sus reperkusyones, mos permete de entender mijor syertas situasyones i de persivir mas klaramente el potensyal pozitivo o negativo ke puedra kontener tal o tal fakto o byen tal o tal proyekto.

Si, komo fue dicho en esta mizma pajina del Şalom de dos semanas antes, “Es inkontestavle ke el estudyo de artikolos eskritos al dia dia, por un gazetero de la dimensyon de Sami Kohen, kon un esprito analitiko de una grande objektividad  i de una probidad absoluta, konstitue un verdadero dokumento istoriko”.