El sujeto es de aktualidad :”la vida de un grande patron”, “el tumulto de dias interminavles sin oras ni minutos”, “la enorme responsabilidad de un sistema ke el establesyo kon egzijensya, i del kual el solo es reelmente kontavle”, “los trokamyentos de mentalidad ke impozan los imperativos de la profesyon”, “su indiferensya inevitavle por su entorno immedyato”, ”su aizlamyento delantre la multitud de problemas a rezolver, al momento de tomar desizyones definitiva“ ets... ets...
Yakup Almelek fue el mizmo un grande patron i konose todos los sakrifisyos ke este posto demanda a su poseedor.
Al empesijo de la pyesa, el otor mos trasa un tablo kaji krual de la vida trepidente de los grandes shefes, todo a lo kualo eyos deven renunsyar, asta renyegar (a syertos momentos) una parte de sus propya umanidad...
Un grande industrial, patron de un echo florisante, totalmente subjugado por su sola aktividad, enfohado en su esforso de ayegar al punto el mas alto, feroz en su ambisyon, asta asperar kon sangre fria i mizmo satisfaksyon la dekadensya total de su konkorente... una vida profesyonalmente intense, ma inumana... salvaje...
Vida limitada no solo a la perspektiva de realizar el benefisyo el mas grande o de trespasar los otros, ma de derrokarlos afin de alkansar a su buto...
Vida de soledad en el triumfo i de dezumanizasyon en la indiferensya...
En su menester imperativo de azerse de mas a mas riko, de mas a mas poderozo, syego enverso su entorno, el se avia olvidado lo ke eran las verdaderas valores de una egzistensya, lo ke era la dulsor del kontakto kon los otros, de la solisitud resiproka, de dar, de resivir... asta el terrivle dia ande aparesyo, infleksivle, inegzoravle en su prezensya, la ke el no asperava.
Es una verdad inkontestavle, nada puede dar esta ermozura inkonmensuravle a las kozas, mas ke la muerte Yakup Almelek, grande umanisto en las dos sinyifikasyones de la palavra: umanitaryo i en mizmo tyempo enamorado de arte, muzika i letras, mos ambeza la vanedad de syertos proyektos diktados unikamente por el orgolyo, mos ambeza a gozar de las verdaderas valores de la vida, mos ambeza a dar, a transmeter, a ayudar.....
