“BİVİR...es lo ke se ve muy ralo en el mundo... La mayoriya de las personas estan “EGZİSTYENDO” solamente, ma no bivyendo...”
Oscar WildeCoya DELEVİNo miresh al titolo hadrozo, keridos amigos, no se afilu komo ampesar mi artikolo. Tengo una “armada” de ideas en la kavesa, i esto indechiza kualas emplear... Solo de una koza esto sigura. Si reelmente lo keremos, devemos ser tambyen dezeozos de bushkarlos estos detalyos. En jeneral, la persona en paz kon si propyo (kendiyle barışık), ayega mas fasilmente a la kontentes, satisfaksyon, i mizmo felisidad. Si tenesh bastante razones de azer loores (şükür), es ke de una manera estash kontente de la vida, o puede ser konosesh una syerta felisidad.
Kada uno tenemos konsepsyones diferentes de la vida, komo se dize, una filozofiya personal. Alora, yo vos konsejo de frekuentar personas tenyendo una vizyon mas o menos semejante a la vuestra. En kavzo kontraryo me parese, seriya difisil, por no dezir imposivle, arrivar a un entendimyento... Salir en bushkida de detalyos agradavles kere dezir en una manera, estar kon djente optimistas i de buena umor. Ansi, tenemos syen por syen la garansiya de pasar oras alegres!... El famozo eskrivano Fransez, Albert Camus tyene dicho: “Si topates la felisidad i la guadrates para ti solo, es una verguensa...” Felisidad... detalyo agradavle de grande importansa... Ke pensash si se partaja kon otros?...
A poko a poko, esto vyendo ke los soldados! de mi armada de ideas estan salyendo uno, a uno... Alegriya, kontentes, buena umor, optimismo ets.. Nosyones eksprimyendo sentimyentos umanos. Malorozamente, ay i otras nosyones, diversos sentimyentos o sensasyones, tambyen umanos, komo la ansya, tristeza, sanya, sufriensa, dolor ets... Es por modo de esto ke Nietzche disho: “El umano enkontra tantas sufriensas en este mundo, ke el solo entre las kriansas bivas, se ovligo a inventar la alegriya i la riza...” No se si lo pude byen tresladar, ma una filozofiya muy onda esta guadrada en estos byervos. En realidad no ay tanto a inventar porke la vida ya mos prokura en vezes, okazyones (chikas o grandes) de kontentarmos...
Solamente, kale apanyar estas okazyones i saver profitar... Rachel Bortnick, muestra amiga de Dallas, tyene el dono de saver azerme plazer kon sus mesajes personal o sitasyones de mis eskritas en el sitio Ladinokomunita. Ansi fue el 5 Desembre 2007 kon su mesaje,“Los korasones son espejos: Hanuka, Flory Jagoda i Coya Delevi en el Shalom...” Se tratava de mi artikolo i poezia sovre Hanuka. Aki esto reelmente rekonesyente a Rachel por aver transferado el teksto integral, espesyalmente la poezia. Ansi, los amigos de Ladinokomunita la pudyeron meldar kon “anchura”!.. Achakes del espasyo limitado en la pajina del “Şalom”, se publiko en karakteres tan “miniskul”, ke syertas amigas me se burlaron en dizyendo: “Deviyas darmos i una lupa para pueder meldar tu poezia!.” No era kulpa miya...
La vida es un regalo, i su valor no depende del nombre de anyos ke egzistimos, ma de la kualidad de estos anyos... Kero meter el punto final kon una fraza del Onoravle Shimon Peres, aktual Nasi İsraelyano: “Mirad kon esperansa al avenir, i kon kerensya a vuestra syedra i derecha...”
