HANUKA...

“Lo ke mos tyene todos endjuntos, es muestra İstorya, muestra Kultura, mustros amores i penas... Tambyen, son i muestras fyestas...”Coya DELEVİAmpesi kon los byervos de Flory Jagoda, de la kerida “Nona” komo la yamamos todos. Durante anyos, yo la konosi solo de nombre. Para los ke se interesan de serka a la Muzika Sefaradi, era la unika ke sintiyan kon plazer desde anyos.

Judeo-Espanyol
9 Ocak 2008 Çarşamba
 Fue myentres de los “Diyas de Kultura Sefardi” el anyo pasado, ke tuve el grande plazer i alegriya de konoser de serka Flory. Tuvimos largas konversasyones, deskuvrimos tener en muestras raizes, ansestros de la mizma alkunya: Altaras... Mi kerida madre nasyo Altaras... En estos diyas de Hanuka es muy natural de akodrarme de Flory i de las “Ocho Kandelikas”. Aki otruna kantika de “Hanuka” suya, ampesando kon estos byervos:

Tiya Mazal mos va yamar,
Noche de Hanuka...
Tiya Grasya mos va yamar,
Noche de Hanuka,
Para asender las kandalikas
Kon toda la Mishpaha...
Las Menoras de sirma blanka,
Ke kale alimpyar...

Keridos lektores, mas no vo alargar. Vos mando mis suetos para una fyesta alegre, djuntos kon esta poezia miya ke eskrivi antes tres anyos...㏿


FYESTA de LUZ...

El Templo Sakro... un kantoniko,
Ayi estava el chiko kantariko,
Kon poko de azete...el uniko...
El kruel Rey de los Gregos,
Djuntos kon sus soldados,
Por el Templo, eyos pasaron,
Estruyeron i  profanaron...

Antiohus, un diya aviya dicho:
“Kale eksterminar los Djudios,
Este puevlo maldicho,
Ke no adora muestros idolos,
Bacchus, Zeus i anturaje...”
İ ansi ampeso el karnaje...
Ombre, mujer i vyejos padres,
Ninyos arresvatados a sus madres,
Todos, de chika o  grande edad,
Pasaron por la espada, sin piadad...

Kon el nombre del D. Sakro,
Aparesyeron supeto i todo troko,
Los MAKABEOS, los ermanos...
Jenerales d’Antiohus, los tiranos,
A los pyes de Makabeos se echaron,
Demandando, implorando el pardon...
Es ke, entonses, desde akel diya,
Djudio, se akodra esta Historia,
Azyendo fidelmente selebrasyon,
De la lucha kontra l’assimilasyon,
İ del azete kon sus maraviyas,
Ke ilumino durante ocho dias...
                                C.D. / 2004